[A pedido de l delegado de la Cruç Burmeilha an Miranda de l Douro, Dr. Fernando Subtil, traduzi para mirandés ls Percípios Fundamentales dessa anstituiçon.
Onte, die 31 de júlio, tube l gusto de ls apresentar, assi cumo a la nuossa lhéngua mirandesa, ne l curso de beluntairos, ourganizado pula Direçon Nacional de la Cruç Burmeilha, na Pousada de la Mocidade, an Almada. Eiqui deixo registrados aqueilhes percípios, an mirandés.]
Porclamados an Biena an 1965, ls 7 Percípios Fundamentales únen ls uorganos de l Mobimiento Anternacional:
Sociadades Nacionales de la Cruç Burmeilha i de l Creciente Burmeilho;
Comité Anternacional de la Cruç Burmeilha;
Federaçon Anternacional de las Sociadades de la Cruç Burmeilha i de l Creciente Burmeilho
Estes percípios assegúran la ounion de l Mobimiento i l sou trabalho houmanitairo.
HOUMANIDADE
La Cruç Burmeilha nace por bias de la preacupaçon an dar ajuda a todos ls feridos, andrento i fuora ls campos de batailha, an todas las situaçones; de defender la bida i la salude; de pormober l respeito pula pessona houmana; de faborecer l antendimiento, la coperaçon i la paç durable antre ls pobos.
AMPARCIALIDADE
La Cruç Burmeilha nun çtingue nacionalidades, raças, cundiçones sociales, credos relegiosos ou políticos, atenendo-se solo a dar ajuda a todas las pessonas cunsante l sufrimiento deilhas i la ourgença de las sues necidades, sien qualquiera classe de çcreminaçon.
NOUTRALIDADE
La Cruç Burmeilha, para mantener la cunfiança de todos, nun toma parte em reinhas i guerras ou an çcuçones de orde política, racial, filosófica ou relegiosa.
ANDEPENDÉNCIA
La Cruç Burmeilha ye andependiente i, ne l eisercício da las sues atebidades cumo ousseliar de ls poderes políticos, manten outonomie que le premite portar-se siempre cunsante ls Percípios de l Mobimiento Anternacional de la Cruç Burmeilha.
BELUNTARIADO
La Cruç Burmeilha ye ua anstituiçon de ajuda beluntária i zantressada.
OUNIDADE
La Cruç Burmeilha ye solo ua. An cada paiç solo puode eisistir ua Sociadade, que stá abierta a todos i stende la sue acion houmanitaira a todo l território nacional.
OUNIBERSALIDADE
La Cruç Burmeilha ye ua anstituiçon ounibersal, adonde todas las Sociadades Nacionales ténen dreitos armanos i l deber de antrajuda.
(traduçon de Amadeu Ferreira)
1 comentário:
La cruç burmeilha yé ua organizaçon internacional muy importante. Mas también son muy importantes ls bombeiros i outros grupos que se formaran por necessidade de proteger ls bens i personas. L ultimo eisemplo yé l grupo de personas que protegeran su barrio nua cidade cerca de Londres.
Hace muy falta amizade, balores e union.
Enviar um comentário