09/08/11

L Festibal Antercéltico de Sendin - 2011


Retratos de Rui Lobo



L Festibal Antercéltico de Sendin, a cada anho se afirma cumo acuntecimiento cultural ancuntornable

Demos nesta Fuolha Mirandesa ambora de l porgrama de l Festibal Antercéltico de Sendin, a la par dua antrebista cun Mária Correia l sou ourganizador i la sue alma. Todo se passou cumo perbisto: ls grupos cantórun, la muita giente beilou, las nuites nun chegórun para tanta gana i para tanta fuorça. Que mais se poderá dezir a nun ser deixar eiqui registro de cumo fui amportante i guapa la buolta de Né Ladeiras, chena de fuorça, eimocionada, sperando que este seia l marcar dun nuobo ampeço. Assi i todo, nun queda todo dezido, yá que muito se passa fuora de l percipal trabiado de l Festibal, i hai quien cuide até que essa ye la parte mais amportante.

Houbo tiempo pa l’apersentaçon de nuobas recuolhas feitas por Mário Correia - cun mais de meia centena de CD’s apuis de haber ampeçado, astanho se realçando nuobas recuolhas de António Mourinho -, l remanse de Fracisco Niebro/Amadeu Ferreira La Bouba de la Tenerie/Tempo de Fogo i la nuoba rebista stramuntana , todo se passando nun balon de la Dega Copratiba Ribadouro.

Diga-se que todo habie ampeçado l die 5, sesta, cun la abertura dua sposiçon de la pintora i poetisa mirandesa Adelaide Monteiro, Sonidos de l Silenço, ne l Centro Cultural de Sendin, que stará abierta al público até al die 21.

Un tiempo alto fui la houmenaige feita al grande gaiteiro mirandés José João da Igreja (1911-1975), cun eidiçon an CD de algues de las músicas por el tocadas i que quedórun grabadas. Trata-se de un de l grandes balores de la cultura musical mirandesa que serie creminal deixar squecer. Bien haias Mário Correia por mais esta houmenaige que mos faç tener cada beç mais proua de la nuossa giente.

Al lhargo de l die de sábado, 6 de agosto, houbo inda tiempo para Dinis Pires ansinar a beilar danças mirandesas, para se apersentáren ne l trabiado de l Sagrado gaiteircos i gaiteiricas, cun ua persença i ua gana que mos déixan outimistas quanto al feturo de la música mirandesa. Todo esto lhebado palantre i ourientado pul grupo de gaiteiros de Sendin, Lenga Lenga, i l antusiasmo de l que ye sue alma, Henrique Fernandes, desta beç acumpanhado pul tiu José Maria Fernandes, l grande gaiteiro de Ruolos.

L festibal ancerrou, yá quaije a rumper l die, culas nuobas Dançadeiras de Sendin, un grupo formado hai arrimado a dous meses i que yá stá a traier pala dança de palos la graciosidade de ls sous passos i l antusiasmo de todo l que ye nuobo sien deixar de ser tradecional. Fui un regalo bé-las beilar i bien háian todos ls que las ajudórun. Eiqui inda tornaremos a falar deilhas.

Mas falta-mos falar daquel que cuidamos haber sido l punto alto de l Festibal, l cuncerto dado por Célio Pires, António Garcia i Sérgio Martins. Cun eilhes i l modo cumo cantórun i anterpretórun ua dezena de remanses tradecionales, la cultura tradecional chegou a un punto altíssemo. Cun l Centro Cultural de Sendin cumpletamente cheno, fui ua grande eimoçon acumpanhar cada ua de las modas que fúrun grabadas al bibo para séren apuis eiditadas an CD. Quando essa eidiçon se fazir tornaremos a falar deste grupo i de la sue stroudinaira anterpretaçon.

Aguardamos la nuoba eidiçon de 2012 de Festibal Antercéltico de Sendin, ciertos de que cuntinará a ser un marco eissencial na cultura mirandesa i un tiempo único pa la sue brilhante manifestaçon, cun Mário Correia cumo ourganizador i maestro.

Amadeu Ferreira




[Testo tamien ambiado pe la Fuolha Mirandesa]




Sem comentários: