23/08/11

Chégan pula nuite ls burnaciegos

Chégan pula nuite
cun las unhas afiladas
scuchilando chicha
i cun la boca sfamiada
chupando l sangre
para que nun quéde nada.



Cerrai portaladas
cun ferrolhos citrados
a abríren-se de par an par.
Torai-las a fechar
cun la fuorça que bos bonde
a un einemigo que se sconde
i de loinge queda a spreitar.


Chégan de nuite ls burnaciegos
crujas, mouchos, lhobisomes
i amanhécen ansangrados
cun ls anstintos carniceiros.
Lhimpos bien lhimpos
pul die ándan çfarçados
de doces cordeiros.




2 comentários:

Almendra disse...

Andas a drumir mal Delaide!
Si hai uns bechicos desses por ende, mas son mais ls anjos buonos que mos afágan, mos dan carinos, mos quíeren.
Pensa ne ls que stubírun alredror de ti an Angueira. Esses outros, nun merécen que perdas tiempo a pensar neilhes.
Beisico
Almendra

Adelaide Monteiro disse...

fui un sfregante de nuite, Almendra. Na berdade esta nuite si spertei a sonhar que staba a tener un anfarte. Que si staba you bien apertada, á maisica que afliçon!

Isto fui solo un sfregante sien amportança. Feliçmente stube arrodiada de muito amigo nesta final de sumana. Nun sou capaç de ber ls bídios neste cumputador pq l falta algo mas solo anstalo apuis senó alhá se me sgota l saldo de la anternete que eiqui ye ua jeringonza bien armada.

beisico