06/08/11

Rosa…l mundo todo!


Antonho anjoldaba-se an seus antriçados pensares. Tantas bezes choraba solico. Lhágrimas scorrian-le cara abaixo sien ser capaç de stancá-las. Lhembra-se-le muito sues pais mas mais sue mai. Porquei nuosso senhor los habie tirado? Cumo podie seu padrino dezir: “Nuosso Senhor ye mui piedoso de todos ls homes mas mais ainda de los garoticos”. Antonho cun dieç anhos preguantaba-se: «serie nuosso senhor assi tan piedoso?» Fuora capaç de le tirar seus pais i lhogo ls dous dua beç? Dous anhos yá se habien passado i nun habie meio de se le sacar aqueilhe pensar de sue cabeça….

Nunca mais fuora capaç de ancarar un poço. I, tanto que le gostaba mirar-se nas sues augas paradas, ber sue guedelha i peinar la marrafa. Agora siempre que ancaraba cun poço zbiaba-se l mais que podie. Fugie de poços cumo diabro de cruç.

Cumo podie squecir l die que biu sue mai i seu pai deitados lhado a lhado, mui branquitos, de uolhos cerrados, manos cruzadas a segurar l terço que todas las nuites rezaban para que Nuosso Senhor ls ayudasse an todo.

Solo agora, dous anhos bolbidos, ampeçaba a “antander” l que se habie passado….Nas traseiras de casa adonde moraba cun seus pais habie un huorto cun poço raso. Tenie siempre auga, nunca se le bira l fundo, lhembra-se de oubir sue mai. Tantas bezes que biu sue mai tirar auga cul balde para dar a mulas. Nun sabe l que se passou mas l mais cierto yera que le se stubísse scucido ua mano ou un pie i caído al poço. Seu pai dando-se de cuonta foi un seu socorro i nun sendo capaç de la tirar acabou por tombar tamien para drento i assi ls dous se morreran afogados i eilhe quedou orfano.

L padrino, l cura, quedou cula responsabilidade de l eiducar. Mudou-se anton para casa de sou padrino que tenie ua burra i moraba cun la criada que se chamaba Rosa.

Nun yera que fosse maltratado, seu padrino queria-le muito i Rosa yera cumo se fuosse sue mai mas teníe muitos miedos.

Un die foi cula burra para l termo, cumo íba muitos de los dies que yá pouco habie a fazer. Chegaban a juntar-se siete ou oito garotos cun mulas, machos ou burros. Nesse die foran para l baldiu que se chamaba prado. L prado tenie alguas hortas i tamien habie alguns poços. Antretube-se cula jolda i quando se spurgatou la burra teníe zaparcido. Beio para casa choroso sien ancontrar la burra i cun miedos de lhebar ua tundia foi scunder-se ambaixo la cama de Rosa. La burra beio solica tener a casa mas l rapaç nun habie maneira d’aparecer. Ls outros garoticos juraban a pies juntos que Antonho tenie benido para casa. Apuis de daren buoltas i mais buoltas i nun lo ancuntrar resolbéran çcansar, pensando que a la purmanha Antonho haberie d’aparecer.

Nessa nuite, apuis la cena i la cusina arrumada, Rosa foi-se deitar. Passsado un cachico l cura foi-se tener cun Rosa. Quando se íban antretendo, l cura diç: «àh Rosa, cada beç que te beio a ti beio l mundo todo!» Antonho na sue einocencia responde d’ ambaixo de la cama: «àh meu padrino, anton, a ber se bei a nuossa burra que se perdeu para l prado.»

2011/Ago/06

Sem comentários: