15/08/11

Antre Monas i Sbolácios- Salimiento

Un salimiento tardiego, mas más bal tarde que nunca.
Será die 21, na Speciosa a las dues i meia de la tarde, na Associaçon ( a la punta de riba de l lhugar).
Apuis fazemos ua currelina de carros até Cicuiro para antrarmos pul  Camino de la Cándena, de Alcides Meirinhos.
Bénga!!!! Ajuntai-bos a nós para fazermos mais ua fiesta de l Mirandés.

Tirado d´alhá:


Era ua nina 

Era ua nina
que benie dun mundo
que nun tenie sol
i quando chegou
se staba a çponer.

Botou-se  a correr,
atrás daquel burmeilho caliente,
para saber se era naciente
dalgun fuogo.

Antes de chegar,
ampeçou a zbotar
la lhuç que dantes tenie
quando quei yá nun bie
i tubo que se deitar.

Drumiu tapada
cun cachico de cielo strelhado
i quando spertou
ye que reparou
que la lhuç yá benie
de l outro lhado.

A dreitos a la lhuç
botou-se a correr
i quanto mais eilha corrie,
mais la lhuç chubie. 
Stando yá cansada,
la nina reparou
que la lhuç se fastaba.

Anraibada,
sentou-se un cachico
i quando mirou,
la lhuç yá era
outra beç lhumico. 
Que cousa será esta,
pensou curjidosa,
mas quando ls uolhos abriu,
biu que staba, na Speciosa. 


2 comentários:

faustino.antao disse...

Oulá Adelaide

Cun muita pena mie, yá nun ando pul praino.

Rezones mui amportantes i de familia. La bida ye assi, cumo se dórun cunta yá an Zenízio stube cul tiempo cuntado

Assi sendo, nun bou a poder star cuntigo i ls amigos an mais esta einiciatiba cultural.

Que todo salga bien son ls mius deseios i de Natália que siempre m'acumpanha nestas cousas.

Ua nota:
Agradecie que m'ambiasses l çcurso pur ameil de l eibento an Zenízio para l publicar ne l site de l'Associaçon "Nial de la Boubielha" se acauso achares bien i quejires.

beijicos
Faustino

Adelaide Monteiro disse...

Bien haias, Foustino. Que todo te baia correndo bien.
Quanto al çcurso si nun te l poderei mandar porque aquilho fui todo amprobisado i, nien que l querga fazer nun se me acorda de l que dixe a nun ser la redadeira parte an que pedi a la giente que ansinasse i falasse cun ls ninos an mirandés. Apuis dixe que gustaba muito de la nuossa tierra i li l poema" percura-me amigo" que dá bien fé disso.

Un beisico para dambos a dous.

delaide