Bieno ne ls jornales i naide l zmintiu que un porsor de Coimbra fui ampuntado de la DREC (Direçon Regional de Eiducaçon de l Centro) por haber assinado ua petiçon on line acontra l modelo de abaluaçon aperpuosto pul Goberno para ls porsores. La çculpa pa l botáren pa la rue fui dezir que l campo que acupaba na DREC era de cunfiança política i de nomeaçon. Todo legal i cumo manda la lei. Estes crimes de un nun pensar cumo quien manda ténen un nome an pertués: “delitos de opinião”, i diç que anté yá tubimos ua cadena afamada para esses zalmados: chamában-le Tarrafal i diç que muito que hoije ten l nome nas squinas de las rues dou alhá culas costielhas. Ye triste, mas peç que legal, l que nun quier dezir que seia legítimo, nestas cousas, ser legal i ser legítimo son dues noçones bien çfrentes ua de la outra. Anfelizmente, nun ye nada a que nun mos báiamos yá afazendo ne ls tiempos que córren, l que, a miu ber, ye un andar al para trás ne l campo cebelizacional. De qualquiera maneira nun hai rezon para muito alberoto, que anté eiqui nun hai nada de nuobo i yá coincemos bien la cuonta.
L que a mi me spantou un cachico, pouco!, ye que tenga chegado a alguas scuolas (nun fui a la mie i tamien nun digo a quales fui, que por haber PIDE outra beç nun quier dezir que téngamos todos de ser chibos), chegou, anton, ua carta a mandar dezir que habie alguns porsores daqueilhas scuolas que habien assinado la bendita petiçon acontra la abaluaçon i que habien treminado a assiná-la nua riunion fazida antre eilhes na scuola, de maneira que habien ido acontra la ética porfissional i tenie que se le alhebantar un porcesso çplinar por se serbíren de las anstalaçones de la scuola sien outerizaçon i para outros fines que nó pedagógicos.
Quier dezir: stamos anton que las scuolas son “cerrados” adonde l “ganado” ten de pacer assossegado i lhapada naquel que spurmentar a ruber un galhico ne l campo que l “pastor” antandiu chinar. De l punto de bista de l “pastor” nun ye mal anjorcado, poupa muito cobradeiro de cabeça tenendo l “ganado” todo a berrar pa l mesmo lhado.
Assi i todo, inda fálhan dues ou trés cousicas, cousicas pequeinhas i sien amportança, nesta manigáncia. L “pastor” ten que tratar de ls “cerrados” i guiar l “ganado”, mas nun ye l duonho, ye solo assi a mod’a quinteiro. Solo ten trato para alguns anhos, i a las bezes inda deixa la quinta antes de arrebentar la fuolha. L duonho, ls duonhos, de ls “cerrados” somos las canhonas todas, muito çcunfio que ye anté por isso que se le chama “públicas”. I las “canhonas”, diç la lei que nun ténen duonho, muito menos ne l pensamiento, inda que ne l cuorpo, l “pastor” nun pare de las çquilar, i cada beç más rente a la piel. I apuis tamien inda hai l porblema de haber leis, que ye ua cousa que nun dá jeito niun quando nun mos cálhan muito a la moda para las perrices que queremos armar.
Buono, tornando al ampeço, tengo que cunfessar que nun traduzi “delito de opinião” por bias de nun saber muito bien cumo habie de fazer. Para “opinião” nun me parece que haba grandes dúbedas, cuido que será “oupenion”; yá “delito”, cumo dá assi tanto a fidalgo, ó se le arranja un sinónimo mirandés ó se apurfilha delito i yá stá, stou que inda ye l melhor: ”delito de oupenion”. Agora, para giente que cuida que puode i debe castigar ls outros por “delitos de oupenion”, seia adonde i quando fur, onte, hoije i deiqui a cien anhos, para falar dessa culidade de giente, ye más fácele, i stou cumbancido que an mirandés, mesmo citre, solo hai ua nomeada, cun quatro palabricas: filhos; apuis ua perposiçon; apuis l artigo defenido, singular, femenino i la redadeira palabra ten quatro letras, ampeça cun un “p” i acaba cun un “a”.
6 comentários:
Isto ye surrial!!!
Se nun mos apurcatamos...ui,ui,!!!
Çqueciu-se.me de te saludar i mandar un beisico, Alfredo.
Apuis que se léien cousas dessas la giente até queda assi a modos que amboubada.
Un beisico anton.
Delaide
Dizes tu Delaide que esto ye surrial, nun ye, ye la berdade, hai ua nuoba PIDE i gente que bibe de l trafico de anfluéncias i l pior ye que usab las anfluéncias para apoucar ls outros. You i mais alguns porsores, quando ampeçou a funcionar l Ciclo an Sendin i para poder abrir naquel anho, porque apuis nun sabiemos l que passarie, a seguir al 25 de Abril, demos scuola de grácia, porque dezíen que nun habie porsores. You fazie parte de l Cunseilho diretibo, pus mal ganhou esta câmara tratórun de cun toda la legalidade poner outro ne l miu lugar.
Buonas tardes
Legitimaçon dada por la lei!!
Mas ye bielho l dito dezideiro: "fázen-se las leis por adonde quieran ls reis".
Yá l dixe eiqui ua beç i torno a la eideia de la defréncia antre Pátria i Cunstituiçon. Esta ye ua lei, la Pátria ye sagrada, representa l pobo, ls balores, ls eideales, la alma dun paiç, algo que nun se ampalpa mas que se sinte, la lhibardade de pensar escorreito, falar i escrebir sien apeias nien oufensas, poder ser lhibre. "Delito de oupenion" ye un dreito i ua oubrigaçon de todos i la Pátria agradece. Solo de la çcuçon lhibre ye que sálen ls melhores eideales i las buonas soluçones. Cumo diç Agostinho da Silva: "quien chega a ua situaçon de berdade queda a un passo de criar ua anquesiçon".
Abraço
!!?? Cumo ne l tiempo de la PIDE i de l campo de cuncentraçon de l Tarrafal (yá agora que las cousas quéden bien claras i sábamos de l que stamos a falar !), Alfredo Cameirão ?
Que eisagero !
Mas bou-bos a dezir l que a mi me chama mais l’atençon.
Falais de muita cousa… mas a niunha altura bos bi you dezir l eissencial.
1° Ls funcionairos públicos, cumo acuntece an todas las Democracies, ténen dreitos mas tamien ténen oubregaciones ! Sabeis esso, tengo la certeza, tan bien cumo you ! Nien ye ua surpresa para naide !
2° Quien redigiu essas tales petiçones i cumo ye que ls problemas fúrun berdadeiramiente apersentados ? Pregunto porque nun bonda dezir que fulano tal fui demetido por haber assinado ua petiçon, que el fusse funcionairo de la DREC ou de outra repartiçon ou serbiço qualquiera. L que ye eissencial relhembrar i custe l que custar ye que quando assinou para oucupar tal ou tal cargo, sabie esse funcionairo l que podie ou nó fazer ? Ou será que na altura de preencher el tamien la petiçon fizo de cunta que nun sabie ? Ou nun quijo saber ?
3° A ninhua altura ne l buosso testo i acaba por ser esso l que a mi mais me choca (i nó outras cousas que you cumo mulhier nun tengo miedo - Só faltaba essa ! - de dezir que las cundeno a 100% !!! i torno a dezir todas las bezes que fur neçairo : 100% !!!), a ninhua altura – dezie you – i sei tamien de l que falo, nunca aparece ne l buosso testo la palabra que debie na realidade de ser la mais amportante. Anton, Amigo, nun hai nesse paíç adonde bibis, trabalhais i gustais tamien de defender ls buossos dreitos (L que nun debe de ser solo legítimo, claro!, mas debe subretodo de ser ser legal, ye ua eibidéncia!) essas antituiçones fuortes i tamien cumpetentes capazes an toda la legalidade i cumo stá prebisto pula Cunstituiçon (I ye esso l que cunta) de mos porteger, de mos defender mas de mos ajudar tamien a ber até que punto podemos ir precisamente na defesa de l nuossos dreitos i rebindicaçones i que son ls SINDICATOS ? Puis ye, ls SINDICATOS ! Porque you digo-bos francamente :
Bien pouco serbirán muitas bezes ls fuorços de andibíduos (cumo you, cumo bós, ua pessona qualquiera!) ou de grupos ou grupúsculos eisolados (que por bezes tamien s’angánhan, hai que ser tamien un cachico mais modesto!) mas que téntan agir talbeç tamien cun muita angenuidade ou até a las ciegas, mas sien nien siempre pedir cunseilhos a quien debe de ser capaç de ls dar, i tamien – i ye esso l mais amportante – sien tomar la precouçon que haba tamien ua tomada de respunsabilidade nó solo de la parte dun ou de dous andibíduos mas dessas struturas andispensables para l funcionamento dua Democracie que son ls sindicatos de funcionairos, cumo todos ls SINDICATOS an giral: bien mais purparados, até juridicamente, para acunselhar cumo debe de ser qualquiera un de nós, mas nunca de maneira eisolada. SIEMPRE pul cuntrairo de maneira coletiba i cuncertada!
Mas tamien, digo-bos: de maneira respeitosa. I a esse respeito precisamente, nien bos pregunto you qual ye l masculino dessa tal palabra cula qual acaba l buosso testo anque sob la forma dua spécie de metonímia ou outra figura de stilo. Nun eisiste l eiquibaliente masculino para essa palabra solo usada, i por mais ancrible que pareça, ne l femenino ? Anton, talbeç yá seia tiempo de assinarmos por ende, nós tamien, i sin tener miedo ningun, ua fartura de petiçones i graúdas essas... i claro, an « connaissance de cause »!! A ber anton se alguien serie capaç de mos demetir a nós tamien?!!! I se por acaso acuntecisse, para mos mandáren para adonde, pregunto? Porque nó anton para passar uns buns dies de férias por eisemplo an Cabo Berde, mas cun uas buonas andemnizaçones morales ou professionales, podeis acraditar!, i tomar ende cumo ua forma de justícia uns buns banhos an augas tropicales ou até mornas... Até quien sabe, alhi pals lhados daqueilho que fui un cierto campo de concentraçon… ou de detençon ? Mas l melhor ye ir a ber nós tamien cun ls nuossos próprios uolhos i falar cun quien sabe berdadeiramiente i puode cuntar, inda hoije, l que esso chegou a ser.
Enviar um comentário