07/03/10

L sítio de l'Associaçon



L sítio www.nialdelaboubielha.org fui l modo que la l’Associaçon Cultural i Recreatiba “Nial de la Boubielha” ACRNB ancuntrou hai quaije trés anhos datrás de s’amostrar al mundo neste mundo marabilhoso que son las nuobas tecnologies.

Buona fui la hora i buono fui l ampenheinho botado puls sous Uorganos, an special la Direcion atrabeç de l sou Persidente an acarinar esta einiciatiba i pormober este porjeto.

Puode hoije dezir-se que l sítio ten sido sien dúbedas nanhuas la jinela abierta adonde ls associados, cunterráneos, amigos i to la giente ne ls mais bariados lhugares de l mundo mirado, lido i sabido amboras de to las atebidades i eibentos de l’Associaçon. Nun fusse este sítio, tengo la certeza, que muita giente que hoije l besita nien squiera le passaba pula cabeça saber de muitas nuobas, de muitos testos i cuontas an mirandés que muitos associados i amigos ténen screbido, de l ampeinho que la Direcion siempre tubo an pormober, balorizar i dibulgar la Cultura Mirandesa, l balor i dedicaçon de ls artesanos Zenizienses.

Mas tamien staba, i stara siempre, ne ls perpositos deste porjeto ser un sítio adonde ls sous associados, familiares, cunterráneos i amigos puoden i poderán botar, screbir, dar a coincer todo l que quejiren, an pertués i mirandés.

S’ua de la rezones mais fuortes era dar a coincer la bida de l’Associaçon, nun l ye menos querer fazer la puonte antre todos ls associados i amigos, assi sendo la Direcion de l’Associaçon i l’Admenistraçon de l site quier i deseia que l cuntato antre todos seia ua rialidade custante. Que seia usado pur todos pa las mais bariadas aciones culturales, artisticas i associatibas, que son las de la sue bocaçon.

L sítio ten sido ua berdadeira rebelaçon ne l que toca a besitas i lheituras, l que quier dezir que l trabalho ten agradado i que hai muita giente que quier cuntinar a saber cousas porqui. Anton solo queda ua soluçon, cuntinar de mangas arrefucidas, trabalhar muito i fazer cada beç melhor.

Sendo este porjeto dua Associaçon tamien ten que ser zambolbido pur toda la quemunidade, puis solo assi será mais plural, rebelará maior alhargamiento d’oupeniones, d’eideias i queres.

Que biba este sitio pur muito tiempo, que tenga ls carinos i besitas de muitos son ls muis deseios, cumo associado, zeníziense, amigo i amante de la scrita i fala mirandesa.




3 comentários:

leonardo antao disse...

Buonas nuites Faustino,

Stás de parabienes porque fuste l associado de la nuossa Associaçon Cultural i Recreatiba Nial de la Boubielha, que mais lhuiteste pa la criaçon de deste nuosso Sítio.

Ye ua grande berdade que “l Sítio ten sido la jinela abierta adonde ls associados, cunterráneos, amigos i to la giente ne ls mais bariados lhugares de l mundo ten lido i sabido amboras de to las atebidades i eibentos de l’Associaçon”.

L Sítio, ye para mie la obra mais fuorte de comunicaçon cun mais giente zeniziense i sin ser zeniziense, la que mais cuntribuiu para melhorar l cumbíbio de las familias zenízienses cun outras mirandesas, que bibimos eiqui pula grande Lisboua.

Nós, la Direcçon de de Nial i todos ls zenizienses, agradecemos la ancomensurable dedicaçon i antusiasmo que tenes ponido na alimentaçon de l Sítio, que ya dou eicelentes fruitos, al ajudar a nacer bários amigos de ls zenízienses, i al dibulgar bários scritores de mirandés.

Stás de parabienesFaustino, porque cun l Sítio, tenes sido l associado de l Nial que mais ten cuntribuido para cuncretizaçon de l purmeiro i nobre oubjectibo de la nuossa associaçon, “mantener biba la lhéngua mirandesa”.

L miu maior agradecimiento i mais arrochado abraço,
Leonardo

adeusdado disse...

Caro Faustino i todos ls bisitantes

Ye sin dúbede ningua, que l SITE de la Assiciaçon Nial de la Boubiielha, ten sido un exito. El cunstitiu ua jinela abierta l Mundo, que se quir cada beç mais acerca tamien palas horas malas.
Por todo esso stamos todos de parabienes, i bamos a cuntinar

Válter Deusdado

franciscobelharino disse...

Buonas tardes Faustino,

Para alhá de tantas cousas buonas que l Nial de la Boubielha ten feito (ancuontros/fiestas, juogos tradicionales, ansino de l, mirandés, i tantas outras cousas). L sítio, ye l que ten dado zde la sue criaçon mais bisibilidade a l' Associaçon Nial de la Boubielha i ten lhebado l que se fai an Lisboua, an Zenízio i an Miranda, a todos ls Zenizienses i Mirandeses spalhados pul Mundo.
Bien haia a la Direçon i als administradores de l sítio i an special a Faustino, que ten sido l grande oubreiro.
Un abraço, para todos ls que dun modo ou doutro ténen dado l sou cuntributo i cuntinai siempre.

Francisco