La tie Balbina

Nin era alta nin baixa, tenie assi l'altura cumo se diç normal. Bá!, agora yá ye mulhier de mais de cinquenta anhos, mas parece tener bien mais. Ten la cara mui stragada, chena de angúrrias. Ye l resultado de tener trabalhado muito al rechino de l sol i an dies de carambelo. Mas, l que la torna mulhier de naide, son ls pelos bien spetados que ten ne l sítio adonde ls homes ténen la barba. Seran por ende uns seis ou siete, que mais se apareçen a sobelas de çapateiro. Agora nun serie qualquiera home que se arrimaba a eilha, cun miedo de ls pelos se spetáren na cara. Mas nien siempre fui assi. Cunta-se que quando nuoba era bien guapa, i apersentaba todo ne l debido lhugar.
Tie Balbina nun se casou, mas mais por ser probe, do que por outra cousa. Passados que son estes anhos todos, eilha recuorda que l mais de las bezes, ls homes querien fazer pouco deilha, i lhembra siempre l tiu Antonho, que un die de chuba la arreculhiu ne l sou curral i le dixo; ficai parende, que you nun bos anquemodo. Çcansou, mas nun se deixou drumir, aqueilhas palabras bailában-le cumo un baile de ruodra, i pensaba: S'al menos l filho que speraba fusse daquel home, nin l delor serie tan grande.
Válter Deusdado