….nuossa senhora dixo dixo, que nun drumisse, que nun drumisse, nun drumisse…..
Quien nun houbiu este cantar al menos ua beç?
Ye assi la moda, l cantar de l Reissenhor.
Segundo reza la stória, ua beç un Reissenhor deixou-se drumir pula nuite anriba dua parreira. Anquanto drumie, la gabinha de la parreira anroscou-se-le a ua pata, quedando preso. I piaba, piaba pedindo oussílio a quien l lhibartasse. Por ende passou Nuossa Senhor mai de Dius que se diç que fizo l mundo purfeito. Mas mais ua beç fui perciso la mano de sue mai para cumponer ls çcuidos dun filho.
Soltou-lo i recomendou-le que, dende palantre para nun se deixar drumir habie de cantar to la nuite. L Reissenhor assi fizo, passou a cantar ….nuossa senhora dixo dixo, que nun drumisse, nun drumisse…. I na berdade assi ten acuntecido zde la criaçon de l Mundo até hoije. L Reissenhor nun mais deixou de cantar, pulas nuites afuora, quien tubir dúbedas puode tirá-las i scuitar este guapo cantar deste paixarico i se le fazir bien atento bai ancuntrar la repetiçon deste dito.
Puode fazé-lo an qualquiera temporada, mas an special bien cedico a las purmanhanas na Purmabera ne ls outibales.
Que serie deste mundo sien ls reparos de las mais? Nun serie pula cierta solo ls Reissenhores que se bolbien a deixar drumir.
2 comentários:
Oula amigo Faustino,Dius bos deia buonas tardes!
Las storias que bos sabeis mas tamien ja la tenie oubido cuntar.
Mas nun sabeis la melhor, ye que you sou acordada todos ls dies por un Reissenhor. You i l miu bezino tenemos ua arboras bastante frondosas ne ls nuossos jardines i l almanecha, todos ls dies, por bolta de las 5 i 30 de la manhana alhá stá el Reissenhor cul sou guapo cantar.
Cousas de la naturaleza!!
Saudaçones amigo
Isilda
Buonos dies,
Faustino, agora que trouxes-te esta cuonta, bou ter que l pedir a mi mai para que me la diga, puis you oubi-la muitas bezes un pequenho i neste tiempo de renobo.
Un abraço,
AC
Enviar um comentário