13/05/09

2º Ancuontro de Bloguers de l Praino





An todo l lhado hai sítios por onde passamos i que mos dízen más do que outros. Seia pul sol i la anclinaçon que ten nessa hora, pul aire que se respira, pul bózio de l siléncio ou por corre de magie, hai rincones que yá nien damos fé que algun die alhá stubimos i outros que nunca çquecemos nien que tan solo ls téngamos mirado meio de sgueilha tanto tiempo cume l sossego de la lhabandeira. Destes, hai alguns no Praino: la Lhuç; l Alto de la Zebra; l Naso; las Arribas; la Trindade … sítios mágicos, puntos que tamien ls Diuses habien de scuolher para pegar ua séstia. Outros haberá, pus todo l Praino ye ua fuonte de saber i de anspiraçon que cada cual sorberá a manadas cunsante l correr de las palabras que dítan las cuontas ou cul mirar al redor de cada ancruzelhada.
L anho passado stube na Trindade pula purmeira beç, antrei naquel terreiro pul camino de l apeadeiro de Fuonte Aldé, aquel sagrado guardado pula cruç anteiriça de cantarie , mirei-la toda al redor, passei an frente a la capielha i ambiquei adreitos a Miranda por antre ls sobreiros que la arrodéian i senti aquel sítio cume familiar, cume se eilhi tubisse stado miles de bezes: la Trindade que Tiu Delgado tanto falaba de sous tiempos de mocidade, el que an moço habie deixado Bila Chana adreitos a la raia de la Cándena, l home de mil cuontas de ancandilar ninos an seranos calcidos por dous rachones, trés príncepes i quatro mouras ancantadas.
Mas l sítio era más do que esso todo: eilhi era un sítio birado al sol; un sítio adonde solo se bei l sol; un ancuontro de gientes i de mundos; ua ancruzelhada de personas!
Quando me dórun la mardomie i l mando para lomear l sítio i l die de l Ancuontro de Bloguers de l Praino 2009, pensei lhougo: na Trindade … l die 22 de Agosto!
La pogramaçon i las andicaçones ban sendo todas dadas eiqui até l final deste més: l almuorço yá stá apalabreado pa l meio die i meia i ls partecipantes deberan anscrebir-se alhá ou antón inda le puode tocar a rober meio cortiço an beç de pan i pinga.
Nota: la falta de anscriçones anula l almuorço i cada cual que se amanhe!



10 comentários:

AF disse...

Buono,

You cuido que yá stou anscrito, zde l ampeço ne l sítio cierto. Mas eiqui bengo a renovar la anscriçon, que nun bás a poder zmarcar l almuorço, á Boieiro.
Bá, bamos a anscrebir, quadrilha.

Un abraço,
Amadeu

franciscobelharino disse...

Buonas tardes Abelhón,

Será cun muita proua que alhá starei ne l segundo ancuontro de Bloguers de l Praino. Bai a ser desta beç que bou a coincer la Trindade, yá que ye sítio adonde nunca stube.

Un abraço,

Francisco Domingues

Artur Esteves disse...

Ls dous Esteves alha estaram.

ACangueiro disse...

A ber se desta beç terei l guosto i l prazer de star alhá i conhecer a todos ls Bloguers de l Praino.

Sabeis, ya me stá a scorrer l'auga na boca... un cachico de marrana assada, an riba de l pan cun aqueilho molhico, cortada cun ua Palaçuola i a la selombra daqueilhes sobreiros, mirando al cielo anquanto se l'aperta l culo a la bota i l spicho antra pula gorja andrento...

Un abraço,
António Cangueiro

faustino.antao disse...

2º Ancuontro de Bloguers de l Praino


-Muito gustarie de star persente neste segundo ancuontro de bloguers na Trindade , mas nesse die, mesmo stando inda de bacanças tengo que acumpanhar la mie tie an Lisboua, adonde ten ua atebidade porfissional.

-Yá limpassado assi acunteciu, mas la bida ye assi mesmo nun podemos star an to ls lhados nien siempre que queremos culs amigos, assi sendo deseio l maior eisito pa l mardomo (pul trabalho que ten), a todos ls partecipantes un die farto, muita alegria, muito cumbíbio i ua buona jornada de lhéngua i cultura mirandesa.

-Mesmo nun stando alhá cun bós, nun me bou a squecer i starei alhá de coraçon i alma.

Un abraço arrochado
Faustino Antão

Obs: L site de l'Associaçon C. i R. Nial de la Boubielha (www.nialdelaboubielha.org) alhá mais arrimado al die 22 de l més d'Agosto die de l Ancuontro bai a fazer la sue dibulgaçon

amadeu ferreira disse...

Buonas tardes Faustino,

Ye pena que nun puodas star.
Puodes fazer agora la dibulgaçon ne l sítio de l nial de la boubielha i apuis acerca tornas a lhembrar la cousa.
Puode ser?

Um abraço,
Amadeu

leonardo antao disse...

Amigo Abelhon
Spero star persente neste segundo ancuontro, apesar de star an preparaçon de outro ancuontro, an Zenízio e/ou an Miranda, de l 10º Anibersario de criaçon/legalizaçon de l’ Associaçon Cultural i Recreatiba Nial de la Boubielha, ne l die 13 de Agosto.
Spero que cun estes ancuontros lhebemos la nuossa lhéngua cada béç más loinge.
Un arrochao abraço,
Leonardo

Adelaide Monteiro disse...

Que buono!
You si quiero star neste ancuontro.
Aquel sítio ye marabilhoso i l mesmo será coincer ls bloguers del praino.
Cuntai comigo.
Bs
Adelaide

Tiégui disse...

Home you de chaça nunca alha fui. Mas se dizes que stan alha quatro mouras (a la mie spera supongo you) anton cume no...

Palmeiros disse...

Biban todos
You tamien bou!
Paulo Meirinhos