16/02/08

Machistas, houmófobos... i tamien racistas ?!





Yá stamos an 2008 i por essa Ouropa fuora inda hai bien defrenças de mentalidades! You, por eisemplo, nun daba un çton podre (un céntimo de euro, hoije an die; esses trocos que quaije nun se béien na carteira de tan pequerrixos que son) para bibir un segundo cun un machista, desses que tamien se quieren aparcer cun buis mas acában por stourar, cumo na fábula de Eisopo, i cunsídran cumo paneleiros aqueilhes que nun son machistas tamien ou nun se quieren aparcer cun eilhes.
Machistas i houmófobos !
Nun eisísten leis an Pertual para castigar tamien tanto l machismo cumo l houmofobismo ?
Debe de star a passar-se la mesma cousa cumo pa l aborto…
Trinta anhos de atraso pul menos an relaçon al que yá stá antegrado nas mentalidades an muitos países zde hai mais dua geraçon para que las leis séian botadas i tamien aplicadas... ?!
Mais ua ardança de l facismo... Salazar, para bien dezir, inda cuntina bibo nas mentalidades de alguns !

Para anrabiar todos esses machistas i houmófobos, xateá-los, bumbardeá-los cun eideias nuobas i einobadoras, «hacer la revolución, Camaradas!», pongo aqui hoije trés modas de l cantor Alain Souchon, tamien poeta. Ye francés i anton qual ye l problema? Quei, nun bonda ser machista i houmófobo mas racista tamien? Purparai-bos, anton !

1. «Le baiser» (L beijo). Na realidade, nó un solo mas muitos, muitos beijos!
http://www.youtube.com/watch?v=ZuwyY2iav-w

2. «La vie ne vaut rien» (La vida nun bal nada). Si bal, splica l cantor, mas nua cundiçon…
http://www.youtube.com/watch?v=A7SmUBnirEo

3. «Sous les jupes des filles» (Por baixo de las saias de las rapazas). Aqui nun digo nada…
http://www.youtube.com/watch?v=AeJwfsY9jjs

N.B. La letra de todas estas modas stá tamien sponible na Anternet.


2 comentários:

Amadeu Ferreira disse...

Buonas nuites, Ana,

Inda nun tube tiempo de 'ouber' todo l que mos amostras. Mas nun cuido que esso seia ua ardança de Salazar, que esso serie un modo de çculpar las pessonas que assi pénsan i serie tamien culpar l paiç. I you gusto muito deste paiç i sforço-me para que seia melhor i nun gusto de oubir falar mal del. Acho que debes de dar na cabeça de quien las merece, mas ls outros (l paiç) nun tenemos la culpa. I giente dessa i inda pior hai-la an qualquiera paiç.
Na lhuita contra essas eideias cuncordo cuntigo. Arreia-le.

Amadeu

Ana disse...

Nun mos anganhemos Amadeu ! You nun quije nien quiero culpar un paíç anteiro mas si un sistema de pensamiento que eisiste tamien, ye berdade, noutros países de l mundo! Mas parece-me que yá faç 33 anhos que las pessonas an Pertual tubírun tiempo de pensar dues bezes an beç dua solo i de chegar tamien a alguas cunclusones ?! Claro que naide gusta que fálen mal de l nuosso paíç; you tampouco. Mas nun ye ua rezon para tapar ls uolhos i achar que todo stá bien porque nun ye berdade.

Nun blog pertués, ancuntrei esto que me pareciu antressante:
(20 de Março de 2007, ne l blogue “Face Oculta”: cumpilaçon de la coluna quinzenal cun l mesmo nome, assinada por Pedro Damasceno, no Jornal Ilha Maior que se publica sumanalmente na ilha do Pico ne ls Açores)
“Sendo (Salazar, antigo seminarista), segundo se diz, um apreciador do belo feminino sempre se comportou de uma forma misógina tendo incentivado um machismo radical que se cifrou por uma anulação da mulher como cidadã de pleno direito.
Possivelmente gostando de mulheres tinha, claramente, medo delas. Ou melhor, medo do mal que os prazeres do sexo pudessem trazer à sua vida de recolhimento e austeridade lembrando-se, talvez, da fábula da maçã e da cobra!”

Ye de notar tamien qualquiera cousa que talbeç seia sintomático. Ls artigos “machismo” i “sexismo”na wikipédia an lhéngua pertuesa resúmen-se a pouca cousa: quaije nada! Cumparatibamente, ls mesmos artigos screbidos an francés ou spanhol até aperpónen mais dados, anformaçones i puntos de bista.
Aparece nessas dues lhénguas la eideia seguinte: an países cumo la Spanha, la Eitália i tamien Pertual ye aceite mais facelemente ua sociedade de tipo patriarcal. Dende essa noçon de “machismo latino”.
An França, ls mobimientos de libertaçon de la mulhier i personalidades marcantes cumo por eisemplo Simone de Beauvoir de quien se festeja este anho l centenairo de l sou nacimiento deixórun puls bistos marcas fondas. Bien mais fondas que nesses trés países. I you stou cumbencida que la sociedade francesa só ganhou an eiboluir dessa maneira.

Outra cousa, Amadeu, se you nun fusse tamien un cachico feminista afinal, de certeza que nun starie a screbir aqui cumo stou a fazer. Calhaba-me.
Esso tamien debe de ser sintomático, nó ?