18/02/10

Ua cuonta - "Este ye l nuosso regalo"



(Esta nina yá ye la terceira geraçon, gerada pula tie de la cuonta, porque retrato desse tiempo nun hai)

La cuonta

Las bibéncias la mais de la bezes son apegadiças, agarrando-se dun jeito tan fuorte que nun somos capaç de las scamugir, you dirie de mos apartar deilhas para siempre. I tamien ye berdade que l mais de las bezes nun queremos, acumpónen-se a la nuossa bida i fáien-mos tan bien cumo la jolda quando stamos solicos, remólen ls nuossos sentidos, dán-mos cachicos de risa i buona çposiçon.
Mirai bós, toda esta cumbersa para bos cuontar ua stória de la mie bida, i tamien justificar l títalo de la cuonta, porque l Natal yá quedou bien alhá para trás, mas Natal ye siempre que la giente quijir.
Stabamos ne l més de Febreiro (22) de anho cinquenta i trés de l seclo datrás.
Nua nuite a la hora de cenar mie mai nun staba, l caldo fui puosto nas malgas por miu pai. Ua para mi, outra para mie armana, que tenie uito anhos, quatro mais bielha que you, outra pa l miu armano cun doze i outra para el, que nun fui quemida nessa nuite.
Angaranhido nestas lhidas de cozina, deziemos:
- Buossa mais stá na cama cun delor de barriga. Quedai-bos quemendo l caldo i pan cun chicha, que you bou-me a fazer un recado.
Dezie todo esso cua cara mesclada de miedo i alegrie. Scapou-se puorta afuora i nun anstantico chegaba cun dues bezinas que fúrun a dreito al sobrado a tener cun mie mai.
Essa nuite por algue tiempo fui anrezinada para todos, naide acunhou uolho, pur antre l bruído de las scaleiras aparecie outro que hai muito nun s’oubie an nuossa casa. Sien ganas de drumir i la falta de mai, abrimos la puorta de l quarto deilha. Eilha arrolhaba un nino, pequerruxo, anxutico de manos cerradas mamando la teta. Quando mos biu acenhou-mos, benie i mirai.
- Este ye l regalo que you i buosso pai tenemos para bós. Nun ye la cousa mais guapa que Dius fizo?!
Nós acheguemos a mai cumo piticos. Un cahico apuis miu pai yá mos ampuntaba pa la nuossa cama, que fazie bien a mai i al nino, mas mie mai nun deixou, deziendo-le:
- Que quéden l tiempo que quejíren qu'eilhes para mi nacírun todos esta nuite.
Por muitos anhos i porque quedou a ser l mais nuobo de la família, siempre fizo l que le daba la gana, i todos nós deixabamos fazer. Se nun querie l caldo nun l quemie, se nun querie bocheira tamien nó, se nun querie ir cul buieiro íba-se cul pastor. Als anhos passórun i agora ye el que mos fai las buntadicas todas.

3 comentários:

leonardo antao disse...

Buonas nuites Faustino,

Esta ye ua antressante stória dun parto, parecida cun dues que you bebi na mie casa, de grande dificuldade pa las nuossas queridas Mais.

Nestes partos "caseiros" criaba-se ua maior cumplementeridade nas pessonas i nas famílias.

Un recén nacido geraba harmonia nas famílias i ajudaba a bencer la desunion i las dificuldades de la dura bida agricola de las nuossas houmildes aldés.

Parabienes por teneres scrito subre este antressante assunto.

Un abraço
Leonardo

franciscobelharino disse...

Buonos dies Faustino,

Ua buona çriçon de cumo nacien ls garotos nesses tiempos i cumo l pai daba essa anformaçon als outors filhos. Decierto que fui assi tamien cun nós i culs nossos armanos. I ende tenemos un rapaç pimpon Jesé Marcelino cun las sues filhas i la sue netica. Parabienes i un abraço.

Francisco

faustino.antao disse...

Duis mos deia buonos dies

-Amigos Leonardo i Francisco you cumo bós sabemos que hoije las cousas tamien nun stan bien, yá poucos ninos nácen pur alhá i alredores, alguns até s'astrében a nacer a camino de l spital nua amboláncia.

-Mas Dius mos balhá, cumo dantes ye que nó, probes mais i probes ninos que nun tubírun las upas de pessonas specializadas, porque las que ajudában fazien l melhor que podien i sabien.

-Assi i todo dezir que todos nós (an nuossas famílias) tenemos stórias bien ricas i cuontar-las nun ye pecado, nun fai mal a naide, yá dezie l outro "nun squeças l tou passado para melhorares l feturo", nun ye rebelar saludades de l tiempo dantes mas si dar balor al buono que se bai custruindo.

Un abraço
Faustino