16/02/10

Quédan-me adjetibos na alma


Nun quiero deixar salir ls adjetibos
ancurralados atrás de portaladas
que quando suoltos boziaran
a quatro aires, sien tino.

Quiero screbir ua poesie doce
para que dóndia,
se baia debagarico
antreduzindo na tierra.

Apuis las letras alborótan-se-me,
las palabras férben,
lhebántan la tapadeira,
ls poemas sálen no báfio
de l pote

que ferbe a cachon.

Scapórun-se-me...
cun la riata a la rastra
i, cumo se fúran
un cabalho selbaige,
relínchan, ls adjetibos.
Tanto!...

Anque nestes tiempos
fágan falta a la poesie,
ls adjetibos,
de todas las quelores i feitius,
you pongo-le un ançaime,
cumo se las palabras
stubíssen danhadas.

Assi,...
quedo-me you a boziar para drento
todos ls adjetibos que deseio
i pinto-los na mie alma,
...an poemas.
Anté un die...

2 comentários:

Almendra disse...

Deixa ls adjetibos a la suolta, eilhes son palabras i naide las puode ancurralar. Quien ten miedo de las palabras nun ama la lhibardade. Ne l percípio era l berbo i nó la lei.

"Facanito de l'anternete" :))

Adelaide Monteiro disse...

Assi tamien ls stou a usar, Almendra. Sien chamar nomes feios stou a chamá-los...

"Facanito" ye ua palabra guapíssema. Dubido que an Pertués hába outra tan sonante. Amadeu acaçou-la bien!

Beisicos

Delaide