11/02/10

Sonhai, sonhai!!!


Spertei cun las poças de ls uolhos
rasicas d´auga salgada.
Nun se me lhembra de ls suonhos
cousadores de la mundiada.

Outras bezes amanheço
cun ls uolhos a rir primabera.
Lhembro-los un pouco al ampeço
mas squeço-me lhougo l que era.

Ls suonhos! Cachos pequeinhos
misturas de l que passemos.
Ls suonhos tamien son deseios
de la bida cun que sonhemos.

Mas ls melhores que tenemos
son quando stamos spiertos.
Son alas que nós ponemos
an postigos siempre abiertos.

Sonhai, sonhai, que l sonhar
la lhibardade garante.
An suonho podeis biajar
l mundo anteiro, nun sfregante.



7 comentários:

ACangueiro disse...

tantos postigos, jinelas, portaladas i alas para bolar...


beisicos,

antonho,

Adelaide Monteiro disse...

I muitos inda sou poucos quando l cuorpo pesa!
Beisicos,

Delaide

leonardo antao disse...

Buonas nuites Adelaide,
Antressante este cachico de l tous bersos “Ls suonhos tamien son deseios de la bida cun que sonhemos”
Para mie la nuossa bida ye feita subretodo de deseios.
Para mie, la bida, mesmo quando parece stragada, ten siempre un fin feliç, quando nós deseiamos ser felizes.
Buono antruido, deseia-te,
Leonardo

Adelaide Monteiro disse...

Ye berdade Leonardo. Neste mundo tan d´alrobés tenemos mesmo que sonhar cun outro melhor, al menos andando nós bien cun nós. Se todo mundo andásse bien cun el, nun fazie tan mal als outros.
buon antruido para ti tamien.

Bs,
Adelaide

Félç disse...

Lindo!!!
la eimage de la autora, por drento i por fuora.
Beijo grande
Félç

Carmo disse...

Mais uma visita ao vosso espaço que continuo a adorar.

Um abraço


Bom fim de semana

Adelaide Monteiro disse...

Felç,
De drento, te mando un beisico, amigo!



Carmo,
Tenemos todo l gusto que benga a bé-mos.
Un beisico para bós de toda la quadrilha mirandesa.

Delaide