25/02/10

Que algo se aprenda cula zgrácia!




Todo se lhembra quando la tragédia se monta anriba de nós. Apuis, repuosta la normalidade de todo, todo se çquece cumo se d´alzaimer todo mundo sufrisse...
Ten sido assi na Madeira, fui ende ou noutro sítio qualquiera, adonde por todo l lhado de l mundo ten habido tragédias, cíclicas mas que inda nun hai Serbício de Meteriologie que seia capaç de las prebener.

Agora falamos de la Madeira cumo poderiemos falar de l Brasil, de l México, de l Haiti ou de tantos outros sítios que ténen dua maneira ou d´outra sido sacudidos pula fuorça de la Natureza que quando eilha quier, nada se l pon delantre i todo lhieba ou çtrui.
Mas, porque ye nuossa, porque ye recente, porque mos entra to ls dies an casa atrabeç de eimages medonhas, porque ye cumo se fura un filho que tebisse quedado todo zbentrado, mais falamos deilha.
Naide puode quedar andefrente a las eimages que bei, an que bundórun uas horas de chúbia fuorte, para streformáren l que era “la Pérla de l Atlántico” nun amuntunado de piedras, palos i lhodo. L que eran ancuostas guapíssemas i ribeiras calmas, son agora galatones gigantes que todo angulhírun.

Un queda a pensar, somos bien pequeinhos!...
Somos na berdade mui pequeinhos acumparados cun la Natureza. Somos mui pequeinhos mas somos tamien mui boubos, porque sólo mos damos de cuonta de la nuossa pequenheç quando somos atacados. Apuis todo se çquece i bai-se seguindo la bida fazendo siempre ls mesmos erros, cumo se la fuorça de la natureza se tebísse scorrupechado cumo l´auga na barrila.

Na Madeira i un pouco por todo l lhado, ten-se cunstruído anriba de ribeiras, ancanhando l´auga apertadica antre casas, sien seguir regras de ourdenamento de l território, sien seguir regras de l plano diretor municipal curreto, quando l hai. Todo ye feito na mira de l lucro, de l cumpadrio, de la currupçon, de la quelor política, an derradeira palabra, de l denheiro, siempre l denheiro...
Todo ye projectado, ou nun projectado sequiera ye, cuntando cun la normalidade de las fuorças de la natureza; mas eilhas a las bezes sálen de la normalidade: ben auga que arrebenta todo para eizegir la sue tierra; bénen ls tremores de tierra que todo abánan, todo ráchan, todo antérran, çtruindo las casas porque nun fúrun custruídas de acordo cun las regras “antí-sísmicas”, para mais lucros haber na custruçon.
L denheiro,...siempre l denheiro de alguns, para zgrácia de todos!

Que algo se aprenda cun mais ua!
Que la Ilha de la Madeira torne a ser ua "Pérola," mas que seia sien se repetíren ls mesmos erros de ua geston que ten sido feita na defesa de antresses de alguns.
Cun la ajuda de todos, todos solidários, há-de tornar a ser...

5 comentários:

Fir disse...

Muito bem observado, cara Adelaide.
Estas construções desordenadas, à revelia do bom senso, não existem só na Madeira, existem um pouco por todo o país.
Era bom que o país reflectisse sobre as desgraças passadas e que dessas reflexões nascessem acções capazes de evitar desgraças futuras.
Abraço,
Fir

Zzç disse...

Buona puosta!

Muito le custa a giente daprender, nó?
I pior, zumbar de'ls que antenden i abísan de'ls prulemas que puoden pasar, i nun fazer nada.

Çcubri esta semana este bídio de fai 2 anhos:
http://www.youtube.com/watch?v=aTf0h3nobAs

Adelaide Monteiro disse...

Ye ua rialidade... De las mundiadas nun se puode fugir que ye la Natureza a medrar de fuorça, mas habie de star todo de maneira a deminuir las zgrácias. L que se bei ye que todo stá alrobés.

Zzç,
L b´dio que sugeristes ye proba de que muitat, muita cousa stá mal. L plano diretor municipal yá ye feito cumo eilhes quieren mas apuis assi i todo inda se fura.
L bídio amostra bien l sítio de las ribeiras todo atulhado de casas armazéns Etc...
L plano de eimergéncia que naide mais se l lhembrou i que tamien ne l filme era aprepuosto, etc...
Apuis, toca que alguien há-de pagar para que todo quede amanhado a spera doutras mundiadas...

bs

Delaide

Félç disse...

La rialidade cruda i znuda, l deneiro i la ganância haden acabar cun l mundo, anteressante tema par refletirmos i passar a usar práticas que puoden fazer um mundo melhor.
Parbienes tie Delaide, i aprobeito pra bos dezir que se quereis saber mais de la REZOSA, benie acá l die 20 de Márcio que sereis mie cumbidada i nun habeis de perder l tiempo.
Para la semana iá bou a poner no sitio de la ACREFA, www.acrefa.pt e en, nuobas.blogspot.com, l cartaç de l'eibento.

Adelaide Monteiro disse...

Se stebir ende, anté sou capaç de ir, Felç.
Starei atenta al cartaç i agradeço-te l cumbite.

Beisicos

Delaide