21/02/10

A ESQUERDA CHOURIÇO

.
La squierda chouriço

An Bergáncia nun hai squierda cabiar. Quando muito, eisiste ua squierda chouriço. Apersenta-se cumo sendo obas, mas obas de cabalha, ó de safio, quando mui de pescada de l'alto. You prefiro chamar-le chouriço, l cabiar de l fumeiro. Mas anton nun hai squierda, an Bergáncia? Hai. Mas esta de que falo queda muito a la dreita de qualquiera squierda de jeito. Senó beiamos:

Ye anteletual, ten ua licenciatura ó mais, amprego de l stado ó afin, biste Boss i usa mala Louis Vuitton. L perfume depende, mas inda hai quien use l bielho Aramis, i até l Chanel 5, essa bomba que derruba un touro a cien metros de çtáncia. Ne l Berano calça chinelos de cuiro i pon sacola a la bandoleira. Faç bacanças pula Ouropa, carotas mas d'assegurado ampato sócio-cultural (nun sei se me fago antender...). Inda pon l crabo i oube l Zeca, mas solo ne l 25 de Abril. Bai al triato munecipal apanhar secas i amostrar-se.

Acha que cultiba l bun gusto. Ye altarnatiba q.b.. Habita, ó gustarie d'habitar, na zona stórica. Ye culta porque lei Saramago. Bagamente yá oubiu falar de Marx. Zeiludiu-se cula classe ouperária, que bei cun moléstia eibidente, an chusmas, a passear al Demingo, de fato de treino, nun centro comercial de l Porto. Bai fazer cumpras al Porto.

Ne l resto, tamien se cumprimenta cun un solo beiso, amostra l carro anhos 60 – i usa la bota de carneira i la saia rodada que fazírun stória.

Arma-se al pingareilho, ye pindérica. Ye eicologista i nunca plantou ua arble. Faç de la lagartixa de rabo azul i de l rato de Cabrera fetiches anteletuales, mas depuis queixa-se de la falta d'auga, quando eilha falta, i de la strada para Bomioso, quando, ralo, alhá bai. Ye acontra la barraige de l Sabor i a fabor de l’Azibo, de que yá fui ferborosamente contra. Déixen naqueilha aparecer la lontra...

Fuma charutos. La mais cultibada aderiu al Bloco i defende las causas fraturantes. Ten pedigree, fantasiado, mas pedigree. Cultiba la zeiluson i l cinismo eideológico. Porque ye chic. Porque ye de squierda. Squierda de quei?

( Bragancabainaite )

4 comentários:

franciscobelharino disse...

Buonos dies Almendra,
Gustei de l testo este. Hai muita giente assi cumo essa de squierda que fais l retrato. Eiquei an Lisboua son las ties de Cascais, mas bai las habendo an todo l lhado.
Un abraço,
Francisco

Ana disse...

Buonas nuites, Primo Zé,

Inda nun será hoije que bou a deixar aqui un comentairo an relaçon al sou testo que gustei de ler. Cuncordo cun quaije todo l que diç mas nó cun todo assi i todo cun todo i habemos de cumbersar se quejir depuis. Mas yá ye tarde para mi. Por ua rezon: stube a respunder a Thiegui que querie saber porque ye que you i Amadeu scolhimos la palabra "teson" an beç de "çamarra" para la traduçon de "toison", la palabra que usa Du Bellay ne l sou poema que tamien gustou de ler, cumo dou a antender.
Se tubir ua eideia tamien an relaçon a essa nuossa scuolha, la mie i la de Amadeu, nun heisite i diga tamien l que puode achar que puode fazer abançar la discusson.

Bá! A ber se tengo tamien tiempo para dezir daqui a poucas horas, mas só a la nuite, alguas cousas que me parécen agora neçairas i que me fúrun segeridas depuis de la leitura de l sou testo...
Curiosamente, quiero dezir a quien agora precisa quien ye que ten "eiducaçon" !

Até manhana se Dius quejir i scriba tamien.

Ana disse...

... Cuncordo cun quaije todo l que diç mas nó cun todo assi i todo i habemos de cumbersar...

Ana disse...

... i que me fúrun TAMIEN sugeridas depuis de la leitura de l sou testo...

(mas nun quiero dezir mais por hoije)