10/02/10

Dá que pensar





Tu que tubiste la tue anfáncia ne ls anhos 60, 70 de l seclo datrás cumo fui possible subrebibires ?

- Diç-me, porque quaisque nun habie altemobles, ls que habie nun tenien cintos para t’assegurar ne l assiento, nun tenien ancuosto nien cadeirica, nien balon para que nun scalabrasses ls narizes?
- Ls ninos iban ne l assiento traseiro jogando cumo querien i esso nun era peligroso.
-Ls carros tenien grades, ls brinquedos éran de bárias quelores, feitos de pequeinhas pieças que se çprendien i naide tenie miedo de l beneno de las tintas, nien que s’atafagasse culas pieças.
- Nun habie trancas nas puortas de ls carros, chabes ne ls almairos de ls remédios, de ls químicos d’anxofrar las patateiras i matar ls scarabeilhos.
- Andábamos de bicicleta i carricos feitos de madeira i lhata sien capacete, nien cotobelheiras.
- Bubiemos auga de ls cántaros de barro sacada de ls poços, na bica, nas fuontes i nun era sterelizada.
- Faziemos ls carros cun ruodras de ls rolamientos de ls motores, botábamos-mos a las lhadeiras abaixo, ls trabones éran ls calcanhares de ls çapatos, quando nun acababamos las çputas ne l silbedo mais próssimo.
- Jogabamos na rua a la belharda, al arco, cua sola cundiçon, que era de bolber al anuitecer
- Nun habie telmobles, i ls nuossos pais nun sabien adonde stabamos.
- Só teniemos aulas a la purmanhana, íbamos almuorçar a casa, que l caldo staba ne l caçuolo, porque frigurifico nun habie.
- S’agarrabamos chizmos (piolhos) la nuossa mai lhababamos la cabeça cun ”Quitoso” i cun peine cerrado sacaba-los muortos, i nun habie alboroto nanhun nien s’ancerraba la scuola pur causa desso
- De cabeça rachada, braços partidos i l çamarro scalabrado, alguien se queixaba?
- Todos tenien rezon menos nós, ls garoticos....
- Naide falaba an bullying (antemidaçon pula fuorça), nien habie gorduxos nien gorduxas para fazer caçuada
- Quando un mercaba ls tubicos d’açucre i gelo, benien lhougo ls outros a pedir para dar ua lhambidela i naide agarrou malina i se muorriu por bias desso
- Nun habie Playstations, NiNtendo, X boxes, jogos de bídeo, telbison pur satélite, DvDs, Dolby Surround, Cumputadores, Anternete etc etc.....
- Quien nun tubo un perro, que quemie l mesmo que nós ou só las sobras, i nun éran lhabados cun auga caliente, algun perro se muorriu por causa disso
- Éran lhabados cun auga frie, anxabonados cun xabon de barra, i a balde.
- A pie ibamos para bien loinge a la scuola, culas bacas sien miedo de ser scornado, cun jolda ou sien eilha, quien se perdie.
- Ne ls studos habie-los buonos i malos uns passában outros marcában passo, quien íba al psicólogo ou fazie terapia de recuperaçon.
- Qual modas de sabexones, quien nun passaba tentaba pa l anho a seguir.
- Las fiestas éran cun gira-discos d’agulha i las bubidas coincidas era la groseilha.

Nun habie miedo, habie fracassos, derrotas, bitórias, deberes i cun todo daprendimos a bibir.
Cumo fuste capaç de subrebibir, ye la redadeira queston?




5 comentários:

Adelaide Monteiro disse...

Antes más nada l miu oubrigada por tenerdes puosto l retrato de la fuonte de la Speciosa adónde you iba zde pequerrica a encher l cántaro i chegar las bacas a l´auga al chafariç, quando iba a ser bueira pal lhado de baixo, nun me benindo dende mal nanhun.
Subrebibimos i mui bien i por isso ye que somos "bien tirados de las gatunhas".
Ye enfrentando deficuldades an ninos que se ganha auto-cunfiança.

beisicos

ACangueiro disse...

bah, bah, nun seiades soudosistas!

L scritor i la purmeira comentadora.

Las carrasqueiras picaban muito i acalcia-se un dues quando las arrincaba i apuis al restralhar al lhume.

Saludo,

acangueiro

Adelaide Monteiro disse...

Nun ye soudosismo, até porque tamien nun hai de que l haber que las deficuldades eran demais.
Ye un dar-se de cuonta que agora las mariquices tamien son demais i tamien nun fai bien. Son dous stremos i la média ye que serie la medida cierta.

Saludos, Antonho

faustino.antao disse...

Bien haias Carrasqueira

Ora, ora alhá stás tu cun essas cousas dantes!
Mas you cuido que t’antendo, até m’astrebie a dezir-te mui bien.
-Anton este fui l modo que tubiste de dezir a las pessonas que para alhá de todo, i deiamos las buoltas que dirmos, l passado nun ye ua cousa para squecir, ou que se puoda apagar cumo se fai nun quadro preto screbido a jiç adonde passamos l apagador ou la manga de la jiqueta
Que l passado fai parte de nós, tenga l nome que tubir, tome la quelor mais clara de l mundo!
Benga l purmeiro a dezir que se lhibrou ou l scamugiu de beç!
-Alguien ua beç dixo que ne l persente debemos saber ou nun squecer l passado para porparar bien l feturo, cuido que fui mais ou menos assi, i culas anterrogaçones que mos deixeste faziste-me lhembrar ls mius aliçaces, las mies raízes de las quales muito m’ambaideço.
I porque eilhes fúrun assi, i mais, tu te squeciste de dezir que agarrado a essas cousas todas tamien benien, balores de respeito pul outros, d’eiduçaçon todo un calantriç que inda hoije me fai muito feliç.
Qual ye l ferreiro que mira pa la reilha acabada que nun queda rendido al mineiro!?
Caro amigo, se nun tenes buonas lhembráncias de l tiempo dantes, you tamien nó, mas nun le guardo sapeiras.

faustino.antao disse...
Este comentário foi removido pelo autor.