03/02/10

Abre de par an par

Deixa que you entre
ne l tou siléncio
para que na tue miolha
çcubra mistérios i çcanse.
Amanheça you ende,
costielhada a ua pinga d'ourbalheira,
cristalina, relhuziente,
cun raiares lilases i alaranjados
dun amanhecer de Agosto
i alhá quedarei l die todo,
la bida toda.
Abre-me l ferrolho
de la puorta de l templo,
esse, adonde
las gestaçones son eiternas,
las palabras nácen de beneiros,
las curas se fázen sien milagres
i, d'adonde
mánan mananciales
capazes de regar stepes,
restrolhos, zertos.
Abre-me las portaladas
desse jardin de streilhas,
adonde
custelaçones son beilarinas
i l Carril ua ourquestra.
Abre de par an par
las puortas de l paraíso,
a la mie alma bagamunda.

2 comentários:

Amadeu disse...

antrar ne l siléncio de alguien!
Ye antressante que quando bemos alguien calhado lhougo pensamos que hai porblemas, quedamos anquemodados i queremos poné-lo a falar..
Porquei tenemos miedo de l silenço?
Gustei, Delaide.
bs.
Amadeu

Adelaide Monteiro disse...

Ye berdade, esse siléncio que a las bezes tanta falta fai para muita cousa i muito mais pal processo criatibo.
Tamien poderá ser antendido cumo antrar nun sítio calmo adonde ancontre-mos la paç que percisamos para l nuosso siléncio.

Beisos

Delaide