26/04/09

Cunjugador de Berbos





Se faltássen probas de que la mocidade ten balor, ende queda mais ua:

http://yuji.ws/berbos/

Esta páigina premite cunjugar ls berbos an Mirandés. Para esso hai que andicar la forma berbal de l berbo, por eisemplo "amar", "labar"...i apuis el cunjuga. Cuido que inda solo stan bien ls berbos rigulares. A ber se se cria ua páigina na Biquipédia pa las pessonas apuntáren erros pa dar ua upa.

Amporta dezir que l outor ye Marcelo Yuji Himoro, un moço de 20 anhos, studante de Ciéncias de la Cumputaçon na Ounibersidade se San Paulo ne l Brasil. Ls mius parabienes para el. I que mais pessonas de l Praino, de Pertual, de l Mundo se antréssen pul Mirandés.




4 comentários:

Amadeu disse...

Buonas nuites,

Quedo mui cuntento cun todo l que se bai fazendo, tan amportante pa la nuossa lhéngua. Rialmente la anternete i la anformática son ua marabilha. Quando Marcelo ampeçou a falar cumigo subre berbos nunca manginei que chegasse eiqui. Inda bien que tubo la eideia. Agora solo falta poner ls berbos que ténen algue eirrigularidade i son muitos. Mas bamos cun tiempo. Cumo siempre, cuntais cula mie ajuda.
Bien haias Scalhabrés por le ires dando estas amboras a las pessonas, a ber se s'antusiásman a fazer cousas.
La giente nuoba ye ua marabilha. Yá you quando you era nuobo, hai mais de quarenta, anhos pensaba assi eheheh!

Un abraço,
Amadeu

franciscobelharino disse...

Buonos dies Scalhabrés,

Que buona eideia esta de la conjugaçon de ls berbos. Nun hai dúbedas que son ls moços que dan cartas an todo l que ye nobidade i nisto de l' anternet naide se pon a la sue frente.
Ye tamien mui amportante que moços cumo Marcelo que nun sendo de l praino ban agrrando la lhéngua i ampeçan a fazer cousas por eilha.
Un bien haia mui grande para ti Scalhabrés, para Marcelo i para todos ls moços que tenen dado la sue upa a la lhéngua.
Un abraço,
Francisco Domingues

Scalhabrés disse...

Biba outra beç,

onte screbi a la priessa i squeci-me tamien doutras cousas. Amadeu Ferreira ten ne l SAL muitos mas muitos berbos cunjugados que puoden ser cunsultados.

Para alhá desso hai ne l Biquicionário 174 berbos cunjugados...i la lista stará pa crecer. Estes ténen por base ls de Amadeu Ferreira solo que stan nestas páiginas pa ser mais fácele percurar i cunsultar.


Anton criei esta páigina pa apuntar correçones a fazer ne l Cunjugador....

ps: la ligaçon de l cunjugador meti-la mais corta que me abisou Yuji. Buona suorte pa ls tous eisames Yuji :-)

Scalhabrés disse...

La ligaçon pa l SAL nun quedou bien. Anton ende bai ua ligaçon direta pa ls berbos cunjugados por Amadeu Ferreira: eiquiAbraço,
Cecílio