09/04/09

Loinge ne l tiempo

Yá tan loinge ne l tiempo
Faziemos las brincadeiras
Sien sabermos l que faziemos
Faziemos nuossas asneiras.

Sien tenermos brinquedo
Brincabamos cul que teniemos
Hoige tan loinge no tiempo
Lhembro-me, de l que nós faziemos.

Tu que eras tan alegre
Que bida fui que bibiste
Que hoije mirando para ti
You beio que stás tan triste.

Parecies un reixenhor
Tan bien que tu cantabas
Era de die, era de nuite
I tu nunca te cansabas.

Que fui que la bida te fizo
Sien tu de conta te dar
Cundanida desta bida
Atirou-mos para este lhugar.

Para quien ne l prencípio
Era alegre i debertida
Mira l que habie-de fazer
Cuntigo esta cruel bida.

Sonho you cun aqueilhes dies
Beio l que andábamos a fazer
Spierto i abro ls uolhos
I nada sou capaç de ber.

An suonho beio siempre
Que tu stás al miu lhado
Mas nada sou capaç de ber
Quando stou you acordado.

Lhembra-me tantas cousas
De las nuossas maroteiras
Hoije stou feliz i cuntento
Lhembrando aqueilhas asneiras.

Pus anton quien las nun faç
Por obra de barzabú
Anton tu nun te lhembras
De las que fáziemos, you i tu?

Deixa alhá nun t'apoquentes
Agora stá todo lhimpo
Todo aquilho quedou pra trás
Yá tan loinge ne l tiempo.

Pronto se nun te lhembras
Nun percisas matar la cabeça
You sigo pedindo a Dius
Que daquilho nun me squeça

José António Esteves




2 comentários:

Abelhón disse...

Buonas nuites

Grande hino a la memoria tiu Ze Antonho.

Un abraço i
Buonos Folares

franciscobelharino disse...

Buonas nuites José Esteves,

Parabienes por tan guapos bersos. Yá stou de nuobo an Lisboua, mas ne l berano ende starei outra beç para cumbersar. Parabienes tamien por mais un batizado dun netico.

Un abraço,

Francisco Domingues