Pertual, Pertual (cuntinaçon)

Ah filhos de Pertual
Gritai todos a ua boç
Abaixo gobierno atroç
Abaixo gobierno fatal
lhimpemos l lhodaçal
L foco de l'ampedemie
Que de die para die
Mos bai scabando l abismo
Adonde stá l heiroismo
Guerra a quien te oufendie

Al probe falta-le l pan
Para se poder alimentar
Mas ten que a fuorça pagar
La sue cuntribuiçon
Para pior cundiçon
Ben l senhor de la fazienda
Pedir de l amanho la renda
L sudor de l anho anteiro
L probe nun ten denheiro
Ten que poner todo a benda

Çpuis l ampuosto de selo
Cada beç mais oumentado
Esse goberno debuxado
Lhieba-mos l cuiro i l pelo
L probe nun ten apelo
Requier nun ye atandido
Por mais que quede oufendido
Son einúteles sues queixas
Ben l mandon fadeixas
Alhá queda l probe çpido

Yá nun tenes tropa de linha
Acabórun cula cabalharie
Yá ye pouca la artelharie
Yá quaije nun tenes marina
La pátria probe i mesquina
Sien crédito i sien denheiro
Esse goberno traiçoneiro
De caloteiro ansultado
Assi anda apregonada
Ne ls jornales de l strangeiro

Pagórun-se binte por ciento
D'ampuosto pa la gobernaçon
Todo bai a parar a la mano, anton
De l home sien sentimiento
Ye este procedimento
De l senhor de la fidalguie
Que pensa ne l die a die
Cumo anchir ls sous cofres
Ai Pertual quanto sufres
Cun toda esta fraguesie

José António Esteves