04/04/09

Cada cabeça sue senténcia

Cada cabeça sue senténcia
La desse tiu ye de l pior
Bamos nós a eignorá-la
I nun le darmos tanto balor


Ye ua grande maçada
Haber mais un eignorante
Que assi nun nistante
Puso la cousa mais cumplicada
Yá nun mos faltaba mais nada
Que aguantar mais ua zabença
Se nun oubir ancumbeniéncia
Digo que debe ser mui brutico
I digo you a esse tiuzico
Cada cabeça sue senténcia


Nun sei que eideias ten l tiu
Mas de todo l que you pude ber
Nun mos debe el conhecer
Adonde ye que yá se biu
Nun bos amporteis pul tiu
Que penso que ye l melhor
Nun le darmos tanto balor
I squecei la ancumbeniéncia
Cada cabeça sue senténcia
La desse tiu ye de l pior

Bós que sabeis cumo ye
Splicai-le al brutamontes
Miesmo stando trás de ls montes
Sabemos que lhéngua eilha ye
Se calha el nun la conhecie
Por esso bamos a ansiná-la
I por scrita mandá-la
A ber se daprende l tiu
I la cousa que fizo l tiu
Bamos nós a eignorá-la


Nós tenemos que mos cuncentrar
Ne l oujetibo prencipal
Ye la nuossa lhéngua afinal
Pula que tenemos que lhuitar
I quien nun quejir cuncordar
Seia pula rezon que fur
Penso you que ye l melhor
Tentar anton ansiná-lo
Ó simplesmente eignorá-lo
I nun le darmos tanto balor.



Esta ye la repuosta al tal eignorante. Quei l podemos fazer, se nó eignorá-lo? Quanto mais falamos nel mais balor le damos. You penso assi, mas cada cabeça sue senténcia.

José António Esteves



2 comentários:

ACangueiro disse...

Bersos guapos i sabedores. Parabienes por estes i ls outros!

franciscobelharino disse...

Buonas nuites José Esteves,

Guapos bersos estes subre l teuzico eignorante.Claro qu' el nun conhece la lhéngua i eignora decierto l muito trabalho que ten benido a fazer-se zde 1882, an que José Leite Vasconcelos la dou a coincer al mundo.
Nun puodemos dar muita amportança a quien nun la ten.

Un abraço i buona Páscoa.

Francisco Domingues