18/04/09

Belmiro dos Santos João - Pruoba - 18/04/1968



La Fiera

Seca chegou no aire a sbolaciar,
Negro l manto i la gadanha afilada.

Mai de relhampos, airaçadas a tronar.
No tou sustento: suonhos çtroçados.

Feia, mala, fiera danhada
Para que bibas, comes las bidas destes soldados.

Chégan an barcos, chenos de mar
homes mudados de ber matar.
Solo a tou lhado outros repóusan … ancaixotados!

Abelhón, 18/04/2009




7 comentários:

franciscobelharino disse...

Buonas nuites Abelhon,

Parabienes por lhembrares mais ua beç la data de l zaparcimiento de mais un moço mirandés naqueilha guerra scusada.

Un abraço,

Francisco Domingues

Unknown disse...

Bien haias por lhembrar a Belmiro, miu cumpanheiro ne l 5º anho i an casa del muitas bezes comi ua chouriça assada i ua tabafeia.
Recordar ye bibir, nunca me squeci del, ne l die 4 de Maio bai a haber un almuorço, an Miranda, de todos ls mirandeses que stubimos nessa guerra, para adonde mos oubrigórun a ir.

Un abraço
Almendra

Unknown disse...

L'almuorço ye die 2 Sabado.
Çculpai l'anganho.

Almendra

Ana disse...

I que nome ten essa fiera, Abelhón ? Custa assi tanto a dezir ?
Muorte solo ? ou tamien COLONIALISMO, DITADURA i SALAZARISMO ?
Hai que tener miedo que mos cóman ou mos mátan inda essas fieras ?
Calha bien ! Acabei de ler nestes dies (Yá bien tiempo que l debie de haber feito) Cada Homem é uma Raça desse moçambicano que se chama Mia Couto. Tengo que ancuntrar tiempo para dezir tamien cousas que quiero dezir.

Ana disse...

... ou mos máten...

Abelhon disse...

Buonas nuites

Ana, cada qual que anterprete cume l dé la gana.
Essas fieras nun pássan de fantasmas de l passado i l peligro estará hoije más nos "iluminati" neo liberales uocos de ética do que nos "ismos" que daprendimos.
Esses ditos políticos, todos ls que coincemos i oubimos falar juran la Cunstituiçón de la República, mas ls melitares cume Belmiro i tantos outros, juran fidelidade a la Pátria. La Cunstituiçón muda-se a la moda de ls gustos de ls políticos que nun ténen bergonha an renegar i arruinar essa Pátria a troco de meia dúzia de fabores ou de proua mofosa.
Precisiamos outro 25 de Abril. Ou será que fui an defenitibo anterrado cula passaige a Manjor General de Jaime Neves, passados más de 20 anhos aspuis de haber salido de melitar al serbiço?

Abraços

Ana disse...

Solo onte me dei de cunta que habie deixado mais un comentairo, Abelhón.

Sabe, la mie cumbicçon ye que nun precisamos de cumplicar eisageradamente ls problemas senó corremos l risco de misturar todo i por fin de acabar por nun antender nada.

Fui subre la guerra quelonial que quijo falar…i tamien relhembrar la memória de suldados pertueses que fúrun bítimas dessa guerra, nun fui ?

Mas fala-mos agora de ls « iluminati »… de l neo liberalismo… i desse militar que fui promobido recentemiente a manjor-general… !!

I se aceitássemos falar antes de todo de l eissencial ?

I l eissencial, Abelhón, ne l caso preciso dessa guerra quelonial nun son tamien las pessonas que lhutórun mas pula andependéncia de ls territórios adonde habien nacido i que eran deilhas i subretodo deilhas zde siempre mas ne ls quales, sabe esso bien tamien, houbo Pertueses que se cunsidrórun cumo ls únicos duonhos capazes de todo, ousando até armas i la tortura, para amponer la sue dominacion ? I inda hoije quien ye que se alhembra de falar tamien nessa realidade ? Menos que un poderie sperar. I esso cuntina a ser nada mais nada menos que ua forma tamien de anjustiça grabe.
.
Puis la mie cumbicçon tamien ye esta : Ls Pertueses cumo outros nun chegaran a lhado nenhun se cuntináren a mirar solo pa l sou umbelhigo. I l sou umbelhigo talbeç tenga un nome : essa palabra, Abelhón, que alguns inda gustan de usar sien saber todo l que eilha puode tamien representar i yá chegou a representar de negatibo… essa palabra, lamento de le dezir, ye la palabra « Pátria »…