20/04/09

25 d’Abril






Nun stá fácele antender l sprito de l 25 d’abril nien las rezones de fazer la sue comemoraçon. La fiesta de ls trinta i cinco anhos de la reboluçon de ls crabos burmeilhos stá bien murcha, i muitos serán aqueilhes que percuráran porquei festejar nun tiempo cumo este. Mas essa percura solo ben porque las cousas stan malas, you acredito que naide hoije pon an dúbedas la sue feitura, stan çcaçuadas de la bida porque acraditórun que se ua reboluçon se fai ye para que todo quede melhor i esso nun stá acuntecendo. Ye berdade que muita giente stá bibindo ls piores dies de sue bida por bias de l’eiquenomie star de patas al aire, sien l sou sustento, sien tener la certeza de dar ua buona eiducaçon als filhos, sien saber se ls sous redadeiros anhos de bida serán passados cun algua denidade, apuis de muitos i muitos anhos sudar las stopicas i tener sido bien mandado ne ls deberes de cidadano.
Acogulhadas d’ancertezas, sien spráncia i sien assomadeiro a un feturo melhor, quien puode lhebar a mal star neste anrezinadeiro!? Mas cuido you que ye nestes tiempos malos que l melhor que las pessonas ténen acocado andrento deilhas ben al de riba, que l balor de la lhibardade, l sprito de l’eigualdade i la fraternidade son zamouchados.
Ye mais que cierto que nestes tiempos mos dá-mos cuonta de l muito que ten que se fazer para que todos téngan dreito a tener ua bida melhor, tener ouportunidade de custruir un feturo i la certeza de que nun son botados fuora quando yá nun serbíren para trabalhar. Ye nestes tiempos que las eideias quédan claras i nun sóbran dúbedas que l 25 d’Abril ten que ser siempre comemorado.
I ua de las cousas mais amportantes, cumo quaije todo, la mantenéncia deste eidial son ls mais nuobos, ye neilhes que ten que se fazer este sclarecimiento, dezir-le quanto custou an bidas houmanas, an sacrefícios i pribaçones la cunquista de la lhibardade. Sembrar eideias d’eigualdade i fazer cun que médren ganas de custruir un mundo melhor.
To l mundo sabe que la reboluçon de l 25 d’Abril nun fui feita para naide quedar pior, mas si para acabar cula represson, pula lhibardade de spresson, pua que l'eigualdade de dreitos de ls tius i ties séian las mesmas, acabar cula guerra quelonial. Se hoije estes balores ándan pulas rues de l’amargura, nien ls tius i ties que lhuitórun i ponírun sues bidas an peligro pa ls alcançar ténen la culpa. Ye causo para dezir “ama-me quando you stubir malo, porque quando stou buono nun perciso”.
Que l 25 d’Abril biba por muitos i muitos anhos.



4 comentários:

franciscobelharino disse...

Buonas tardes Faustino,

Amigo Faustino, cumo dizes l 25 de Abril tenie cumo grandes oujetibos antre outros; acabar cula represson, cunquistar la lhiberdade de spresson, stabelecer l' eigualdade antre ls tius i las ties i acabar cula guerra quelonial. Se oulharmos bien al nuosso redor damo-mos de cuonta que solo un de ls oujetibos fui cunseguido. L tener acabado la guerra quelonial. Esta fui ua grande cunquista, mas sabe a pouco i todos tenemos de cuntinar la lhuita para que ls outros oujetibos séian repuostos.

Un abraço i biba l 25 de Abril

leonardo antao disse...

Oubrigado Faustino por este guapo testo, que a mie me atinja de ua forma mui special.
Fui ua inesquecible nuite, la de 23 para 24 de Abril de 1974, que passei sien dromir, a scuitar, mui baixico, l radio, i pronto para partecipar na rebuluçon.
Ua buona parte de ls mieus camaradas de cuorso, partiporan na reboluçon de ls crabos.
Fui un Prebilégio Stórico para muitos de la mie geraçon, teneram-se abinturado i arriscado la bida i la carreira militar para daran l grande salto Stórico para Pertual se poder “Descolonizar, Democretizar e Desenvoler” (3Ds).
Screbiste bien Faustino, “Se hoije estes balores ándan pulas rues de l’amargura, nien ls tius i ties que lhuitórun i ponírun sues bidas an peligro pa ls alcançar ténen la culpa”.
Estes homes nunca deban quedar squecidos, pul sou feito de balentie mereçan ls nuossos maiores agradecimientos.
Un abraço,
Leonardo

Ana disse...

Stube a pensar nua cousa, Faustino Anton…
Quantos anhos de guerra quelonial se passórun (Claro que houbo que tomar la decison i aceitar tamien de se rebuoltar !) antes que ls militares se decidíssen a deitar abaixo para siempre l regime de Salazar-Caetano ?

13 anhos ?

13 anhos de sofrimiento i d’ anfierno antes de mais nada (Por mais que le custe a oubir esta berdade a alguns) para todos aqueilhes (i tamien ls seus pais yá bielhos, i tamien ls ninos einocentes alhi tamien presentes), que bibien nessas tierras que éran deilhes an purmeiro lhugar i zde siempre (i nó nuossas cumo alguns chegórun a pensar i talbeç inda pénsen !)…

13 anhos ??!!

Bien tiempo demorou essa guerra ! Até mais que qualquiera ua de las dues guerras mundiales.

Fui ua fiesta i ua libertaçon l 25 de Abril, an Pertual ?

Solo se puode sperar ua cousa : ye que a partir dende nunca se demore tanto tiempo a tomar las decisones que se ampónen. Para la lhiberdade de todos.

I falando nas ties, deixe star que bien sabemos nós las mulhieres que yá mais de 2000 anhos que ls tius nunca fúrun capazes até agora de tomar las decisones i las einiciatibas que mos permitan para siempre tamien a nós de mos sentirmos berdadeiramente eiguales als homes.
Tamien nós sabemos l que l’houmilhaçon, l’antiminidaçon, la falta de reconhecimiento i descriminaçon tamien an ciertos casos inda quieren hoije anfeliçmente dezir.

Para nós, puode acraditar, inda hai muitos 25 de Abril que inda stan por fazer.

faustino.antao disse...

Dius mos deia buonos dies a todos

-Nun fusse essa baliente reboluçon i bós bien l sabeis tal qual l dezistes, nien porqui cuido you podiemos trocar oupeniones
-Hai tanto que fazer i oujetibos a reponer todos l sabemos, las geraçones feturas ban a dar ua upa, you acredito l camino nun se fai al para trás.
-l'Administraçon de l site de l'Associaçon Cultural i Recreatiba Nial de la Boubielha publica un pequeinho testo de la stória de la Reboluçon i ende pon la frol que nesse die mais segneficado tubo, para rebelar que esta Associaçon antende (cumo las demais) bien ua de las cousas que l regime mais oudiaba, l associatibismo.

Un abraço i biba l 25 d'Abril