12/01/09

Geada 2008


Fui ne l die 27 de l més de Dezembre de 2008. Nuite gilada, ua fiesta ourganizada pula Jubentude Mirandesa, cul nome 1.º Festibal de Cultura Tradecional de las Tierras de Miranda “Geada 2008” .
Cumo nun podie deixar de l ser, nun faltórun la palhestra subre la Lhéngua Mirandesa, mui bien feita pul grande studioso i lhenguista Amadeu Ferreira, bien cumo pouliteiros i gaitas de fuolhes mirandesas i, bien dezindo, tamien galhegas. Cumo amante de l sonido i de l timbre ancunfundible, dantes tocado puls gueiteiros que yá mos deixórun, mas que sembrórun raízes. Raízes que síguen to ls mobimientos de las gaitas, i tal cumo ls outros amantes desse sonido palmelhórun alguns cientos de quilómetros para ber la anterbençon musical dun grupo que, querga-se ou nó, fui ne ls anhos 90 un de ls ampulsionadores de la rebitalizaçan de la gaita-de-foles, nun solo an las tierras de Miranda, mas tambien a níblel Nacional.
Stou a falar de la banda de Gaitas ”Gaitafolia”, banda salida de la “Escola de Gaitas da Associação Portuguesa para o Estudo e Divulgação da Gaita-de-Foles”. Associaçon que relhançou nun solo nuobos balores que s’apaixonórun pulas gaitas-de-fuolhes, cumo tamien cuntribuíran pa l aperfeiçonamiento de artesanos que s’antrégan de cuorpo i alma. I cada beç mais la perfeiçon desse strumiento musical ye balorizada, que se puode dezir que hoije an nada se quédan atrás de ls artesanos galhegos. Son jobes gueiteiros i artesanos que en 2000 i 2001 fúran cumbidados a partecipar an alguns eibentos nas tierras de Miranda i que, sien pedir pagas, partelhórun todo esse saber, talento i purfeiçon, cumo músicos i cumo artesanos. Fui un spácio de tiempo cúrtio, puis zdende deixórun de ser cumbidados!
Esso lhieba-me a fazer ua percura bien simpres al repundable puls eibentos. - Porquei deixestes de mos cumbidar? - Sien antender la rezon, la mie eironie queda cun ganas de salir a campo: - será que nun mos cumbidán porque sáben que ganhamos todos ls eibentos!? Sou alguien a quien las suspeitas puoden ser atiradas quando falo de gaitas, mas çfendendo pouliteiros, gueiteiros i la lhéngua mirandesa, las gientes de l praino Mirandés, sues culturas i tradiçones. A miu ber l’Associaçon pa l Estudo i Dibulgaçon de la Gaita-de-Fuolhes, las bandas de gaitas “Gaitafolia” i la reciente banda “Roncos de l Diabo” que siempre colaborórun, na dibulgaçon de la Música i tamien na padronizaçon de la Gaita-de-Fuolhes Mirandesa, muito Trás ls Montes, i concretamente la região de l praino Mirandés muito dében.
Nunca ls jornales regionales dórun çtaque a todo esto, i a porbá-lo stá la reciente ida de la banda “Roncos de l Diabo” a Miranda adonde, la berdade seia dita, mais ua beç deixou la sue marca de prestígio. Nun solo a nible nacional, mas tambien par’alhá de frunteiras, ten coutibado por cumpleto la mocidade, tal cumo se passou cula Jubentude Mirandesa an l “GEADA 2008”.
Nun tengo l’antençon de lhebantar qualquiera guerra, mas la banda “Roncos de l Diabo” mesmo apuis de ber l pabilhon “Multiusos de Miranda” cheno de l giente, temiu l pior. Éran ls últimos a tocar, pouco faltaba pa la purmeira hora de la madrugada, staba friu, las pessonas ampeçórun a salir de l pabilhon, i dende nun salie l outro grupo para dar lhugar ls “Roncos de l Diabo” de Lisboua. Mas alha se resobírun, era la ua de la madrugada l público quedaba-se spetante, mas alhá s’óuben ls purmeiros roncos, éran ls “Roncos de l Diabo” la mocidade buolbe al Multiusos i ampeça a puxar i calcer aqueilha nuite gilada, ampeça l bailo i passados que fúrun poucos minutos, toda aqueilha mocidade quier ls Roncos. L delírio tomou cuonta de todo, pedírun-le para quedar mais acerquita, abaixar de l tabrado quedar ne l meio deilhes, l cumbíbio, la fiesta que durou arrimado a ua hora i meia.
Alhá na fin essa jubentude rendie la sue houmenaige, cun simpatie i admiraçon. Este ye l modo desta banda, benida d’alhá bien abaixo mas de l mesmo Paíç, star i dibulgar la música i cultura mirandesa, solo quier l sou lhugar, nada mais quier an troca.
Porque cuido, cun toda la justiça, falar na perséncia desta banda de gaitas naquel que fui l 1.º festibal “GEADA” ourganizado pula Jubentude Mirandesa i dado que a ls jornales dende le passou çpercebido, lhembrei-me de botar neste nuosso blogue este assunto, i manifestar assi a la banda “Roncos do Diabo”, a la Jubentude Mirandesa, i demais jobes que de bários sítios que eili stubírun. Ye la música, la lhéngua, la cultura, las tradiçones que dibulgamos, mesmo loinge de la tierra que mos biu nacer, que fui la Tierra de Miranda.
Para todos l miu bien haia.
José Ventura.


7 comentários:

Boieiro disse...

Buonas tardes

Inda bien que se fala na Geada essa porqui i suobre esso deixai-me dezir dues cousas:
- de loubar l iniciatiba, béngam muitas más;
- la Jubentude de Miranda sabe i puode fazer más i melhor, por bias de la pouca dibulgaçón, horas de las atuaçones que naide sabie ...

Un abraço

Tiégui disse...

Si pus you ya nien m'habie lumbrado de la fiesta ! Que burro. Bon hai que dezir que fiesta tamien l'habie na raia Alcanhiças, Mubeiros, ya Custantin, mas sta cierto ye difrente.

franciscobelharino disse...

Buonos dies José Ventura,

Faziste bien an dar notícia subre este eibento que tubo pouca dibulgaçon. You stube na palhestra subre la qual yá dei cuonta neste sítio, mas nun quedei a ber l restro i tengo pena.
La tue andignaçon acho que ten toda la rezon i cumo diç Boieiro ls jobs de Miranda puodan fazer más i melhor i decierto ban a fazé-lo an nuobas einiciatibas.
Un bun anho para ti i familha.
Francisco

leonor ventura disse...

Adorei o vosso blog!
Continuem sempre assim e venham mais vezes ver a nossa linda terra mirandesa:-)

leonor ventura disse...

Um grande beijinho pro meu sobrinho João Ventura.

Carlos Santos disse...

Estive lá e foram momentos especiais. Obrigado Miranda do Douro.

Deixo-vos o link para fotos do Geada. Um outro local onde a malta que lá esteve escreveu umas palavras:
http://forum.dancastradicionais.net/viewtopic.php?f=2&t=412

Carlos Santos disse...

Estive lá e foram momentos especiais. Obrigado Miranda do Douro.

Deixo-vos o link para fotos do Geada. Um outro local onde a malta que lá esteve escreveu umas palavras:
http://forum.dancastradicionais.net/viewtopic.php?f=2&t=412