L purmeiro ancuontro de bloggers de l Praino

Ne l die 22 de Agosto, arrimado a meidie ajuntórun-se ne ls cabanhales de l Naso Abelhón, Aventura, Ana, Almendra, franciscobelharino, José Ventura, Manuol Bandarra, Manuol Carbalho, Tiégui, Tortulhas. L mais deilhes na cumpanha de la tie ou tiu i de alguns amigos. Cumo l mais de la giente nun se coincie, cada un que chegaba daba-se a coincer i alhá ampeçaba a meter cumbersa cun eilhes i iba ponendo la sue seinha ne l cartaç que Abelhón habie purparado para asinalar este purmeiro ancuontro. Que guapo staba l cartaç! Tenie un galho de cerdeiro cheno de cereijas que anté fazien auga na boca solo de oulhar. Apuis de algua cumbersa i de mos coincermos todos staba na hora de la puosta a la moda de la Tie Ginja, filha de la Ginja bielha de Malhadas. Yá stábamos a la buolta de binte pessonas, mas inda faltaba l percipal repunsable por este ancuontro i sien el nun se podie ampeçar, mas deili a un cachico alhá apareciu l porsor Amadeu i la sue tie Crestina.

La fame inda nun era muita, mas la chicha anriba las greihas cheiraba bien i iba fazendo auga na boca. Apuis de starmos todos santados nua mesa corrida i cun talhos feitos de tabras, lhougo ampeçou a correr la fogaça amassada pula ti Ginja i cada un cun la sue palaçuola iba cortando l sou carolo para acumpanhar cun la puosta que nun tardou an aparcer.

La chicha era buona i las palaçuolas tamien cortában bien i assi todo ajudaba. Pul almuorço afuora la cumbersa cuntinou animada i dou para mos coincermos melhor uns als outros i anté para lhembrar tiempos antigos. Ls apreciadores de bino tenien lhebado la sue garrafica i alhá íban fazendo la sue porpaganda a la medida que íban porbando cada ua deilhas. Apuis de todo mundo star cheno de chicha i pan,todos alhebantórun l copo para fazer ua salude a este die de fiesta i aperponer nuobo ancuontro.

Antes de salir de l cabanhal cada un fui pagando ls ouros que Tie Ginja stableciu i eilha anté se sticou un cahico. Se calhar pansou que nós éramos giente de denheiro, mas cumo era die de fiesta todo mundo pagou i quedou assi la tie Ginja melhor. Apuis fumos todos pa la selombra dun carbalho centenairo que tenie ua torada tan fuorte que dous de nós de braços abiertos quaijeque nun l abraçábamos.

L porsor Amadeu, ancustado a la torada deste carbalho, ampeçou a falar deste purmeiro ancuontro i de l segnificado deste tener sido ne l lhugar Sagrado de l Santuário de l Naso, tamien centenairo cumo l carbalho i la lhéngua Mirandesa que tan falada tenerá sido al lhargo destes séculos pulas pessonas siempre que: apuis de oubir l sermon de çpedida a Nuossa Senhora ne l die de l Naso, falában uns culs outros admirados cun aqueilhas palabras bonitas que l pregador tenie dito; comien las sues merendas a la selombra de ls carbalhos i de ls freznos ne l die de l Naso; bandien l sou bitelo ou l sou ganado; mercában ls lharegos para cebar durante l anho que apuis de las matáncias dában l sustento de chicha durante l anho; mercában ls metros de fazienda ne ls dies de feira als tandeiros para fazer las camisas, las ciroulas, las calças, la jiqueta, l jaleco i las cebolhas i ls pumientos a las ties sandinesas para poner las hourtas.

Todo isto tubo ua amportança mui grande para que la lhéngua mirandesa tubisse passado de giraçon an giraçon anté ls dies d’hoije. Hoije hai muita giente a saber screbi-la, mas hai cada beç menos giente a saber falá-la i isso nun ye buono. Se nun la falarmos muorre-se tal cumo l lhatin que yá naide l fala.

L porsor Amadeu, rebelou-nos an purmeira mano ua çcubierta feita por el i l sou filho Pedro, ne l Museu de Arquelogie de Lisboua, de Ls Quatro Eibangelhos traduzidos por Bernardo Fernandes Monteiro de la Pruoba, que se julgában perdidos i de muitas cartas recebidas por José Leite Vasconcelos de ls sous colaboradores de mirandés, alhá stando las de Fernandes Monteiro i de l Abade de S. Martino, Manuol Sardina, talbeç ls sous melhores anformantes i colaboradores. De las cartas que José Leite Vasconcelos screbiu als sous anformantes nada se sabe, talbeç stéian perdidas ou andrento de algua arca. Esta çcubierta ten ua amportança mui grande pa l mirandés i pa la stória de la sue eiboluçon cumo lhéngua.

Claro que stando ne l Naso, lhugar tamien sagrado pa l jogo de la barra, yá que era eiqui neste terreiro que an todos ls dies 22 de cada més i ne l die siete de Setembre, que ls melhores jogadores de cada tierra i tamien ls melhores ciganos se çfruntában. Cada par de jogadores zafiaba outros dous a jogar a remeias de bino ou a cántaros que apuis era buído por todos. Assi, ls amantes de la barra, tubírun ouportunidade de matar l bício atirando cada un dous ou trés tiros cun ua reilha que Francisco tenie lhebado.

Inda antes de las çpedidas Amadeu Ferreira, agradeciu a cada un por haber stado neste purmeiro ancuontro i diç que l segundo a realizar an Agosto de 2009, será ourganizado por Abelhón/Alcides de Cicuiro an die i lhugar que el anformará, pa l qual stan yá todos cumbidados; ls que stubírun astanho, ls que gostában de tener stado, mas por afazeres professionals ou outros, nun pudírun star i ls demais que quergan aparcer.

Francisco Domingues, 4 de Setembre de 2008.