La Sesta Palhestra de Mirandés (1)

La sesta i última palhestra antegrada ne l Curso de Lhéngua i Cultura Mirandesas tubo lhugar ne l die 21 de júnio de 2008, ancerrando tamien l quarto anho de l ansino de l Mirandés an Corroios. Stubírun nesta sesta palhestra 33 pessonas i l porsor Amadeu fizo la sue prática subre ls Romanos na Península Eibérica i, mais cuncretamente, na Tierra de Miranda.

La Península Eibérica staba dibidida nesse tiempo an porbíncias i a Norte de l riu Douro habie la Galécia cun la sue capital an Braga i ls Astures cun la capital an Asturica actual Astorga. Ls Romanos antrórun na Penísula Eibérica, pul Sul adonde queda agora Barcelona an 218 a. c. i solo chegórun ne l anho 19 a.c. al último reduto de ls Astures ls Mons Medullius (Monte Medúlio), adonde eisistírun las maiores minas de ouro de l Ampério Romano. Las frunteiras de las dues Porbíncias andarien antre ls rius Sabor i Tua.

L pobo Astur staba debidido an 22 tribos sendo ua deilhas ls Zoelas que habitában l território que iba zde la Sierra de Reboredo an Moncorbo, seguie pul purmeiro troço de l riu Sabor i era delimitado pulas Sierras de Bornes, Montesinho i Culebra indo a zambocar ne l riu Esla, l mais grande braço de l Riu Douro que bai zauar na Barraige de Ricobayo. Segundo Plínio, ls Zoelas fabricában ls mais finos lhinos que ls Romanos ousában i tenien ganados de bacas. Tenien ua sociadade matriarcal i bibien an Castros, an sítios altos, mas benien pa ls baixos adonde cultibában l lhino i pastoreában ls ganados i ls Galaicos bibien an Castielhos-Citánias. L sítio adonde hai mais lhápides funerairas desse tiempo bai de Lhagoaça a Miranda. Essas lhápides éran feitas an granito, piçarra ou mármore que debie salir de las minas de St. Adrian.

Estas lhápides stan scritas an lhatin, lhougo ls Zoelas fúrun sendo aculturados. Ls nomes de ls Romanos tenien siempre trés nomes i ls Zoelas tenien un nome i apuis un segundo nome a dezir a que familha pertencien i hai muitas lhápides que ténen um nome i apuis l segundo andicando a que familha pertencie. Ls símbolos son tamien mui amportantes nas lhápides, bien cumo la representaçon de ls animales que éran representados nessas lhápides. Esses animales son corços ou beados i berrones ou cochinos munteses.

Ls Astures tenien ua árbole sagrada para eilhes, que era l Teixo i era benenosa. Tenerá sido dessa árbole de que ls habitantes de Mons Medullius tirórun l beneno para poner fin a la bida quando ls Romanos tomórun l sou último reduto. Esta árbole yá stá quaijeque extinta, mas hai ua an Bergáncia andentro de l Asilo de ls Bielhos. Ye ua árbole mui grande, dá uns fruitos burmeilhos i ten uas fuolhas finicas. Hai chamadeiros lhiados al Teixo, eis.: Cobas de l Teixo (Argoselo); Alto do Teixo (Santulhon); Teixoeiro (Palancar); Teixoeira (Zenízio); Teixeira (aldé de Miranda); Taxeira (Infainç); Teixedo (Bergáncia). Ls nomes Teixugo ou teixiego (tipos de Carbalhos) Teixugueiro (Caçareilhos) i Teixugueira (Santulhon).

L porsor Amadeu falou an seguida ne ls Cumbenes de ls Zoelas, feitos antre dues familhas çfrentes de ls Zoelas tenendo cumo çtemunhas ls Romanos. L purmeiro Cumben diç assi:

Sendo Cónsules Marco Licínio Crasso i Lúcio Calpúrnio Piso, a 4 de las kalendras de Maio de l anho 27 a.c., la gentilidade de ls Desoncos, de la gens de ls Zoelas i la gentilidade de ls Tridiabos de la mesma gens de ls Zoelas, renobórun un Cumben de houspitalidade mui antigo i todos eilhes se recebírun uns als outros an sue proteçon i clientela i la de sous filhos i decendientes.
Assinórun Arausa, filho de Bleceno i Turaio, filho de Cloutio, Dócio filho de Elesus, Magilo filho de Cloutio, Bodécio filho de Burralo, Eleso filho de Clutamo, cula mediaçon de Abieno filho de Pentilo, magistrado de ls Zoelas.
Feito an Curunda ne l anho 27 d. c.

Ls Zoelas yá nesse tiempo tenien ua buona ourganizaçon i la sue autoridade era repersentada puls magistrados. Curunda serie la capital de ls Zoelas i nun se sabe bien adonde quedarie. Podie ser an Castro de Avelhanas, que quedaba mais ou menos ne l centro de l Território Zoela, podie ser an Rabanales tierra pertico de Alacanhiças, podie ser an Picuote ou an Villalcampo na Tierra de Aliste.

Passados 120 anhos ye assinado outro Cumben, que diç assi:

Sendo Cónsules Glabrio i Homullus. La mesma gentilidade de ls Desoncos i la gentilidade de ls Tridiabos aceitórun naqueilha clientela i ne ls ditos Cumbenes a Semprónio Perpeto Ourniaco, de la gens de ls Cabruagénigos, ambos a dous Zoelas.

Fazírun l Cmben L. Domitio Silo i L. Flábio Sebero, an Asturica 11 de Júlio de 152 d. c.

Quando ls Romanos chegórun, yá habie giente que tenie las sues familhas, ls sous diuses, la sue Cultura i l sou zambolbimiento.
Las lhápides funerairas ancuntradas na Tierra de Miranda apersentan, an muitos casos la scrita que corresponde al nome de la pessona ende anterrada, la figuraçon de animales i plantas i l astral. Las lhápides son al modo dun jazigo i screbidas nun serien nada fáceles de fazer. Todo lhieba a crer que haberie a modo de oufecinas artesanales an St. Adrian adonde serien feitas i apuis lhebadas an carros de bacas pulas pessonas que las habien mandado fazer. Las lhápides ancuntradas ténen siempre l nome de la pessona ende anterrada i apuis l nome de la sue filiaçon eisemplos de dezires: A Docia, filha de Clouto (Aldé Nuoba); A Cloutina, filha de Trito,de 30 anhos (Angueira); Anio Rufino, a Caio Annio Sílvio, sou pai de 50 anhos (Dues Eigreijas); Atiano Rufo, a sue esposa Flaccila, filha de Flaco (Picuote); Als Diuses Manes, a Cornelia Favina esposa fidelíssima de 35 anhos, l marido (Saldanha); Marco Sulpício Flavo, a Camila, esposa santíssima de 50 anhos (Saldanha).

Hai tamien muitas lhápides dedicadas a las crianças i als jobes eis.: Lúcio, al sou filho Antonho falecido cun 9 anhos (Aldé Nuoba); Nigrina, filha de Severo, de 22 anhos (Cércio); Sílvio Calvino, a sue filha Calvina de 28 anhos i a sou nieto Caio Sílvio de 1 anho (Dues Eigreijas); a Beumeno, de 25 anhos; a Martinho, de 20 anhos i a Vitor, de 15 anhos (Dues Eigreijas); a Tourin, de 6 anhos (Palaçuolo); a Festo de 8 anhos (Picuote); a Sexto, filho de Alavo, de 20 anhos (Santulhon).

La única profisson que ye referenciada nas lhápides ye la de militar, dada la sue amportança nesse tiempo, assi tenemos:

A Emílio Baleso, porta bandeira de l´Ala Sabiniana, ancarregado de ls recoincimientos de la Centúria (Aldé Nuoba); La Centúria cumpriu de buona buntade, à sue custa, a la memória de Fausto, porta bandeira (Picuote); a Júpiter Óptimo Máximo Depulsor, Domício Peregrino, beterano de la lhegion VII, Gemina Pia i Feliç cumpriu ua pormessa de lhibre buntade (Saldanha). Ua lhegion tenie antre quatro a seis mil suldados, ua centúria correspondie a ua compahie i tenie a la buolta de 80 suldados. L acampamiento permaniente de la Lhegion VII de l Ampério Romano staba an Lheon.

Na Tierra de Miranda Picuote ye l sítio adonde hai mais lhápides funerairas i a seguir aparece Saldanha. Hai tamien lhápides an Malhadas, Bempuosta, Angueira, Argoselo, Palaçuolo, Dues Eigreijas i Trabanca.
(Cuntina)

Francisco Domingues, 24 de San Juan de 2008.