La Quarta palhestra de mirandés

La quarta palhestra tubo lhugar ne l die 12 de Abril, i desta beç l porsor Amadeu fizo la sue prática subre ls seclos V, VI, VII i VIII. Falou-mos de ls pobos que stában nestas tierras zde l anho 411 anté 711, anho an que ls Árabes chégan a la Península Eibérica. Ls pobos que habitában la Península nesse tiempo éran ls Suebos, ls Alanos, ls Bándalos, ls Besigodos, ls Romanos i ls Zoelas. Ls Zoelas habitában para acá de las Sierras de Nogueira, Sanábria i Culebra, anté por baixo de ls Montes de Mogadouro. La capital de ls Zoelas, chamada Curunda, hai quien diga que tenerá sido an Castro de Avelãs i sabemos que este pobo se dedicaba al cultibo de l lhino i a la criaçon de l ganado. Ls Bándalos i ls Alanos teneran stado mui pouco tiempo. Quedórun ls Suebos i algun tiempo apuis benírun ls Bisigodos.
Ls Suebos ampéçan las campanhas de spançon an 450 i ban a cabalho por ende abaixo i atácan ls Romanos. Ls Romanos que nessa altura stában anfraquecidos pedírun ajuda als Besigodos, estes aceitórun i apanhórun ls Suebos junto de l riu Órbigo, un afluente de l Esla i este de l Douro. Ende trában ua batalha culs Suebos, tenendo estes sufrido ua grande derrota. Hai ua tierra cul nome de Hospital de Orbigo i ten esse nome porque tenerá sido nesse sítio que ls feridos dessa batalha na sue maiorie Suebos fúrun tratados, i mais tarde tenerá serbido de spital al pelegrinos de Santiago. Passados uns tiempos ls Suebos ganhórun de nuobo fuorça i ampéçan outra beç ls sous ataques. Assi, ls Besigodos fazírun ua frunteira defenitiba i na tierra de Miranda essa frunteira passaba por Mogadouro. L porsor Amadeu, anfurmou que hai uito tierras cul nome de Mogadouro i essas tirras son:
Mogadouro, sede de concelho ne l distrito de Bragança, Mogadouro, ne l termo de S. Salvador, cunceilho de Mirandela, çtrito de Bragança, Mogadouro de Baixo, Mogadouro de Cima i Alto do Mogadouro ne l conceilho de Ansião, çtrito de Coimbra, Aldeia de Mogadouro, na freguesie de Mesquitela, conceilho de Celorico da Beira, distrito da Guarda, Aldeia de Mogadouro, ne l conceilho de Oleiros i Aldeia de Mogadouro, ne l çtrito de Castelo Branco. Quedemos assi a saber que la palabra Mogadouro ye formada por Muga mais Gothorum. Muga que quier dezir frunteira. Gothorum que quier dezir de ls Godos. Muga Gothorum que passa apuis a Mugatorum, apuis dou Mugatorio/Mugadorum i chega al nuosso Mogadouro que quier dezir frunteira de ls Godos. Esta frunteira passarie assi pula ounion dua lhinha antre todas essas tierras cul nome de Mogadouro i durou zde l anho de 456 an que Teodorico II subjuga ls Suebos i l sou Rei Requiário ye cundanado a la muorte, anté l anho 585 an que Leobigildo acaba cul Reino Suebo.
La única lhápide paleo-crestiana nas nuossas tierras coincida ye de 634 i fui achada an S. Martino de l Peso an Mogadouro. Esta lhápide stá ne l Museu Abade Baçal an Bragança i fui Proteu que la mandou fazer a la sue tie. Proteu era Besigodo i yá debie ser un home culto i tamien rico. Nas eigreijas de Azinhoso i Algosino, hai sinales fuortes de la presença Besigoda. Esses sinales son ramadas, ubas, etc. Hai un templo Besigodo de l seclo VII que ye S. Pedro da Nave i queda quando se bai de Miranda para Çamora, apuis de la barraige de Ricobayo, na tierra cul nome de S. Pedro de la Nave. Quando fui feita la barraige este templo iba a quedar einundado. Assi, las pessonas numarórun las piedras todas i fazírun de nuobo la recustruçon de l templo tal cumo era dantes.
An Moelas de l Pan houbo scabaçones i chegórun a la cuncluson que, puls achados ende ancuntrados, tenie habido nesse sítio fortificaçones de ls Besigodos i de ls Suebos. La lhéngua Goda tenerá tubido ua anfluença grande pa l Mirandés. Sabemos hoije que l Mirandés antruncou ne l lhatin i fizo apuis la sue eibuloçon.
Antes de ls Árabes, la Tierra de Miranda i l grande corredor junto al Douro, dun i doutro lhado era cunsidrado cumo zona de frunteira i nessa altura zona de frunteira era zona cun autonomie. Ls Árabes stubírun pouco tiempo, yá que eilhes se fixórun mais ne ls centros ourbanos i cumo nas Tierras de Miranda nun habie grandes cidades nun quedórun por eilhi. De la preséncia de ls Árabes nun hai decumientos, mas mesmo assi deixórun muitas palabras.
Ne ls seclos VIII, IX, X, XI i XII, houbo un fenómeno migratório de pessonas que íban fugidas de ls Árabes de Sul para Norte. Estas pessonas falában ua lhéngua de mistura Romana i Árabe éran ls Moçárabes i tenien la religion de ls crestianos. Ne l seclo X ye fundado un grande mosteiro San Martin de Castañeda na Sierra de Senábria por frailes moçárabes benidos de ls lhados de Coimbra i doutros sítios. S. Martino de Angueira pertencie zde l seclo XI al Mosteiro de Martin de Castañeda i dende ser la tierra adonde inda hoije se fai l plural de alguas palabras an -es an beç de -os [ex. gato-gates].
Ne l seclo IX, l Reino de Lheon ampeça a cunquistar tierras als Árabes i ne l seclo X cunquistan Coimbra. Nas cunquistas que íban fazendo ls nobres guerreiros quedában culs árabes, passando estes a trabalhar para eilhes na cunstruçon de templos, fortificaçones i outros trabalhos duros. Inda hoije se diç dua pessona que trabalha muito `”ye un mouro de trabalho”. Ls Árabes stubírun na Península Eibérica anté l anho de 1452 i an Pertual anté l anho de 1239.
Mais ua beç l porsor Amadeu, dou a coincer l sou grande ampeinho i l muito trabalho que ten feito a la buolta de la Lhéngua Mirandesa i ls grandes coincimientos que ten subre este assunto. Un bien haia i nunca te canses de passar esses coincimientos. Un bien haia tamien a todas las pessonas que stubírun nesta palhestra.
Francisco Domingues, 14 de Abril de 2008.