Huorta – Balancia

Alguas cousas que quedei a saber subre la balancie.

Dízen que ten la sue ourige ne l zerto de Kalahari i yá mais de 5000 anhos era cultibada ne l Eigito, tenien tanta fé neilha que yá la ponien ne ls túmulos de ls reis cumo oufrendas.

Bieno pa ls Paízes de l’Ouropa trazida puls pobos Árabes, que deiqui ls Pertueses i Spanholes la lhebórun pa las Américas ne ls fins de l seclo XVI.

Este fruito sendo solo quaije auga (92%) ten esta lhigaçon cul seco, dende ser buona para matar la sede quando la calor ye muita i an sítios que l clime ye siempre mui caliente. Cun muitas culidades cumo quemido para la salude an giral.

Ne ls zertos i an África ls biandantes gústan de la lhebar pa las sues jornadas.

L que you sabie por spriéncia própia era que alhá nas tierras de la mie aldé habie siempre buonos i guapos balanciales, que s’antolhában a quienquiera. Cula miolha, amarielha, branca ou burmeilha éran docicas. Ende arrimado a la fins de l més d’Agosto, noutras tierras era mais temprano, fazie-se la redadeira colheita, alforjadas i sestos deilhas que quedában nua tulha, nun éran taludas cumo las que se bien a bender na feira de l Naso que beníen de baixo, mais maneiricas mas saborosas.

Tamien sabie que era buono de saber quando ls garoticos quemien balancia, quédaban siempre cula cara toda lhambuzada, lhabada ne ls beiços i çúzia l restro.

Quando s’íba a lhabrar la lhata que tubo las balancieiras ancuntrában-se uas pequerricas que nacíen fuora de tiempo, era solo scocha-las ne ls zinolhos ou nun calhau i pronto, sabien tan bien.

La redadeira que quiero dezir ye que quien quejir, quemer la balancia frie ye solo pone-la abierta al sol, nun ye perciso ser a la selombra nien ne l gelo.