12/03/13

DE MI PARA MI




PARABINES TIU JANTONHO

Parabienes tiu Jantonho
Pe las sessenta i seis Primaberas
I outros tantos Eibiernos
Que fazen las cousas mais beras.

Outros tantos Outonhos, digo you
Para cumpletar ls ancaixos
I outros tantos Beranos
Que fazen ls altos i baixos.

Todos juntos fazírun esta bida
Que bos ten trazido de pie
Que tengades muita salude
Tanto de nuite cumo de die.

Puderie haber sido melhor
Para animar essa fiesta
Mas nun bos pudemos dar outra
Por isso ide bibiendo esta.

Que seia todo de bien
Isso si bos pudemos desear
Agarraibos cun todas las fuorças
Para melhor la aguantar.

Para melhor la aguantar
Inda que seia als sticónes
Cun anganhos i zanganhos
I alguas cunsemiçones.

Cunsemiçones I anganhos
Tamien fazen parte desta bida
Que la mai natureza mos dá
Pruntica a ser serbida.

Tenemos que mos agarrar a eilha
Cun las melhores antençones
Porque neilha tenemos que bibier
Las nuossas grandes eilusones.

Eilusones que a las bezes
Biráran an zilusones
Cu las cunsemiçones a mistura
Passáran a ser recuordaçones.

I porque recuordar ye bibier
Tamien fai bien recuordar
Estas i outras pripécias
Que na bida tenemos que passar.

Que na ribeira que ye la bida
Passa l´áuga i la broça
Por isso nós la bamos passando
Siempre metendo ls pies na poça.

Mete pie saca pie
A las bezes todos anlhoroçados
Por causa de ls muitos zleixos
Que an nós stán ancrabados.

Nestes sessenta i seis yá passados
Yá de todas las cousas se passórun
Mas teneis que seguir lhuitando
Que eilhas inda nun s´acabórun.

Ye un cunseilho que bos dou
I agarra-lo, nun custa nada
Depuis ye pune-lo an pratica
Para cumpletar la salada.

Agarrar l cunseilho sie l´agarro
Que el nun custa assi tanto
Depuis puner-lo an pratica
Ye que nun sei se m´aguanto.

Adius i buona suorte
Muitas i muitas felicidades
Que la bida sie ye feita
Destas i d´outras berdades.

Berdades que eiqui quedan
Se fazierun falta ye agarrar
Las muitas lhamurias de la bida
Qu´eilha inda tubier para mos dar.

Muitas i muitas felicidades
Agarra-las quien nun querie
Mas yá mos damos felizes
Cu l pan nuosso de cada die.

Cu l pan nuosso de cada die
Que ye bien duro l uosso
Mas que baia cozendo l fuorno
I que l pan seia nuosso.

I que l pan seia nuosso
Siempre dará outro jeito
Muitas i muitas felicidades
I yá agora, tamien bun porbeito.

José António Esteves
Lhar de San Jesé Bumioso




2 comentários:

leonardo antao disse...

Buonas nuites tio José Antonho,
Parabienes por estes guapos i antressantes bersos.
Un abraço,
Leonardo

ACangueiro disse...

gostei de bos ber pul facebook. Claro ls bersos tamien me gustan.