Ua cuonta-l paredon

L paredon de la prensa (barraige) medraba a la bista de todos, medraba a bun medrar.

Adonde ainda bien poucos dies nun se bie biba alma, puis este sítio staba perdido ne ls cunfins de l mundo, habie birado nun formieiro i nun remolido d’afazeres que naide quedaba queto, era toda ua atebidade mandada por angenheiros i capatazes, terminando al que cada un habie de fazer, cousa nunca dantes bista por Fracisco, a nun ser quando fazie parte de las camaradas de segadores, i s’íban pa la Granja  ou Fuonte Lhadron, puis ende las segadas ampeçában mais temprano que an Zenízio, mas mesmo assi era ua cousa só asparcida i an muito mais pequeilho.

Todo este rebolhiço era cousa de muita admiraçon, nun staba afeito a tanto, mas a ua cousa el staba decedido, era a bencir todos estes atalancadeiros, habie de s’afazer tan bien cumo ls demais, mesmo que ls sous percípios fússen outros i bien bien defrentes, mesmo que eiqui nun se trabalhasse cun foices, gadanhas, biendos, biendas, arados, rastras, tejeiras de çquilar, habie de botar manos nas patarras, picaretas, çadas, palas, serrotes, martielhos, machadas i daprender a ser barragista cumo to l mundo.

L paredon medraba, habie carpinteiros a alhebantar sebes de trabas para recebir cimento to las bint’i quatro horas al die, el tamien trabalhaba por turnos i esso nun era l grande problema del, puis l trabalho i la gana de bencir dában ua buona upa para assossegar la cabeça.

L pior era quando se deitaba naquel catre de fierro, ne l silencio, ls uolhos mirában pa ls caibros que sustenien l telhado de la camarata, mas ls pensamientos salien i bolában para bien loinge, passában nun sfregante las frunteiras, bolában para adonde tenie deixado todo l que era sou, toda la sue riqueza, ende si era cumpleto, tenie l carino de la tie i l’afeiçon de ls sous ninos. Fazie pula bida agora eiqui, i todo staba bien, to l mundo botaba trato cumo a un de ls sous, siempre prontos a dar ua upa, esta tierra tamien sabie recebir, bien loinge de l que se dezie deilha.

Mas nun era solo l paredon de la prensa que medrában, ne l sou coraçon de pai i tiu tamien medrában las soudades, las ganicas de ls ber i beisar, cumo pchuócas stában agora çpuostas a spurmentar até adonde Fracisco rejistie.

Fracisco era un tiu de calhos nas manos, nun ls agarrou eiqui, fúrun sendo parte del çque se sentie giente, habie d’agarrar calhos i jeito de ser l mesmo tiu, pai, home, loinge, n’eimigraçon.