Fracisco I°

Durante alguns minutos, talbeç ua hora, onte a la nuite, muitos jornalistas (franceses por eisemplo) chamórun l nuobo papa: Fracisco I°. Esse nome fizo-mos anton pensar, aqui an França, eimadiatamente noutro Fracisco I°, François Ier, un de ls reis mais cunhecidos de la stória de França que reinou de 1515 a 1547; fúrun reis an Pertual, durante esse mesmo reinado: D. Manuel I i D. Juan III.

Aqui stá el, l mecena de Leonardo da Vinci, admirador de ls pintores eitalianos Rafael i Michelángelo, mas tamien l cunstrutor de ls castilhos de Blois i de Fontainebleau i subretodo de Chambord acerca de l Loire, residéncias menumentales para ricos antre ls mais ricos adonde caberien inda hoije bun númaro de  apartamientos de alguns ou até poucos metros quadrados cumo muitos daqueilhes que hai nua capital cumo Buonos Aires ou tamien an muitas outras capitales de l mundo : 

I até mos surprendimos a pensar, nós aqui an França. Cun que anton, bamos a tornar als tiempos de l Renacimiento!? Até que l Baticano pediu para que l nome fusse corregido i que l nuobo papa fusse chamado solo Fracisco anquanto nun houbir outro cul mesmo nome...

L que ye stranho porque, segundo parece, inda nun hai muitos anhos deixórun Juan-Paulo I° chamar-se assi, mesmo antes que aparcisse Juan-Paulo II...

Por outro lhado, nun podie haber un nome mais francés do que aquel que scolhiu este nuobo papa na medida an que eitimologicamente esse nome designaba percisamente ls habitantes de la França. Até ls pais daquel santo de l’Eigreija que se chamaba Fracisco de Assis (que parece haber sido un de ls que motibórun este nuobo papa a scolher este nome) acabórun por chamar l filho “Francesco” anque tubisse sido batizado einecialmente cul nome de  Giovanni. Antre outras cousas, inda cúntan alguns, porque l pai habie feito buns negócios i anriquecido an França…  

Anton para nós que bibimos, hoije, nesse mesmo paíç que ye la França – paíç gobernado diga-se de passaige por alguien tamien chamado “François” -, ye eibidente que bamos prestar ua atençon mui particular a este nuobo papa argentino de ourige eitaliana chamado Jorge Mario Bergoglio mas que dun die para outro scolhiu de se chamar “Fracisco”: Francesco (an eitaliano), Franciscus (an lhatin), Francisco (an pertués, castelhano, galego, etc), François (an francés), Francis (an anglés), Francés (an oucitáneo), Franciscu (an asturiano), Franziscus (an alman), etc., etc. 

 Tantos nomes afinal para un solo papa !