Ls dies íban-se sumindo, las lhidas íban tocadas.
To las nuites quando s’arrecolhie, apuis de botar ls crios
na cama, miraba al redror i ende stában çpinduras todas las cousas de sou tiu,
puis solo habie lhebado l que bestie mais ua fardela cua códia pa l caminho,
scundiesse cumo un zbalido, era un fugido, que scapaba sien saber par’onde, mas
fusse para adonde fusse yá habie ganhado la spráncia que serie para melhor.
A albertina fazie-le bien mirar para todas estas cousas,
para estas bestes, pa las cholas, pa la gorra, era cumo s’el ende stubisse,
acunchegaba-las i inda sentie l oulor de l sou cuorpo, la calor de las nuites
adonde eilha stubo anroscada ne ls sous braços, nun era suonho, nun éran ls
delírios de qualquiera malina, era porque era la sue tie, porque era la sue
mulhier, porque del habie recebido l melhor quenhon, la melhor i mais abençoada
birtude, d’haber sido mai.
Bencida pul suonho, antes de cerrar ls uolhos daba las
grácias por mais un esse die, por haber bencido todas las canseiras i tristezas,
por star ende a mirar puls filhos i de l home pul mundo, s’algue par’eilha
pedie era que tubisse fuorças bastantes para cuntinar a se mai, a ser tie.
Sentie que nesta houmildade de fémia, de mai, de duonha de
casa, staba la grandura de ser mulhier, que nun drumie solica, mas cula
cumpanhie de ls qu’eilha mais amaba, de la família.
Sem comentários:
Enviar um comentário