09/09/13

VI Ancuontro de Bloguers de l Praino Mirandés




L outor de l testo i retratos que eiqui se amóstran, apersenta-se nas paiginas eiletrónicas cumo “Transmontano à Descoberta”, (you solo traduzi l que screbiu i fui cun sue outorizaçon) chama-se Aníbal Augusto Gonçalves, porsor de matemática i Ciénças Naturales ne l 2º Ciclo. Fui porsor i bibiu an Miranda de l Douro antre 1997 i 2007, adonde torna muitas bezes. Apeixonado pula naturaleza i puls retratos, cuorre toda la region i ten blogues i facebook adonde mos amostra muitas cousas de la nuossas tierras.


Ende ls sous retratos i l que screbiu subre l nuosso VI Ancuontro.



“Cun tanta cousa a passar-se durante l més d’agosto nun me fui fácel star ne l VI Ancuontro de Bloguers de l Praino Mirandés. Yá tube l’antençon de ir an eidiçones d’ anhos anteriores i faltei, por esso, ayuntei bárias atibidades para l fin de sumana i fiç la mie anscriçon a la última.


La mie lhigaçon personal cun ls bloguers de l praino nun yé fuorte. Conheço poucos, mas quaije nun acumpanho ls blogues, por falta de tiempo, mas tamien porque nun tengo l saber de la fala mirandesa, que ye aqueilha an que la maior parte se sprime ne l cunceilho de Miranda de l Douro i alrredor. Assi i todo, cada un a sou modo, partelhamos muitos de los gustos, de las preacupaçones, de ls sentimientos cula tierra i esso yá ye rezon más que bonde para you querir star persente.
 

A tal puonto staba you cuntento que fui l purmeiro a chegar al Centro de Música Tradicional Sons da Terra, an Sendin, puonto d’ancuontro antermédio antes de mos irmos para Bempuosta. Foi buono assi, porque tube ouportunidade de fazer ua bejita guiada más al permenor (bien haia a Mário Correia).


Fui mui antressante berificar l trabalho zambulbido mas tamien apreciar l acerbo de l própio centro. Cunstitui un puonto de referéncia ne l campo de la música tradicional i yá un centro de mimória, quier de personas, quier de sonidos. I cumo la música ye ua lhéngua ounibersal cabén alhá outros sonidos, de bários locales de l mundo, cun special çtaque para ls de la raia, porque ye cumo diç Mário Correia “eilhes (spanholes) sáben mais de la nuossa música do que nós da deilhes”.

Chegórun mais personas, uas mies conhecidas, outras nó, antre eilhas l Leonel Brito, amigo bloguer de l Farrapos da Memória, de Torre de Moncorvo. Anque nun staba alhá pa l ancuontro, mas pa bejitar l centro.


De Sendin salímos para Bempuosta, ne l cunceilho de Mogadouro, adonde se íba fazer l ancuontro. Curjidosamiente l’aldé de Bempuosta fui de las derradeiras aldés de l cuncelho de Mogadouro que bejitei, inda hai pouco tiempo, por esso staba cun buontade de cumpletar la recuolha de retratos que yá tenie feito.

Chegados a Bempuosta yá staba un buono cembon de personas a la spera, acumpanhados pul senhor Perjidente de la Junta de Freguesie que mos dou las buonas benidas i mos acumpanhou pula aldé.

L ambiente era de buona çposiçon; la maiorie de las pessonas yá son amigos. Tirando a mi i mais uas dues ó trés, todos tenían stado ne ls ancuontros de ls outros anhos.


Cun mais dua hora d’atraso ampeçápos la bejita als lhocales mais amportantes de l’aldé.

La capielha de Santo Cristo fui mos apersentada pul Sr. Cura Bento Pires, que s’ancuontraba ne l lhocal ne l terminar de ua celebraçon. Ls frescos çcubiertos  que stában ancubiertos de reboco son fantásticos merecían mais atento se tubíssemos antidades mais repunsábles ne l campo de l patrimonho.

Quien conhece la capielha de Nuossa Senhora de Teixeira, acerca de Torre de Moncorbo, i acumpanha l que se stá a passar alhá, nun ten muita sperança nua possíble recuperaçon de la capielha de Santo Cristo.


Camínemos pulas principales rues de l’aldé cun paraiges acerca als menumientos i eilementos de maior relebáncia: Solar de ls Marcos, Capielha de S.Sebastian, Eigreija Matriç, Capielha de Sta. Bárbera, restros de las muralhas de l castielho, brasones de l’aldé, pelourino, etc. Feliçmente teníamos cun nós un ajuntouro de pessonas de la tierra cun porfundos conhecimentos, ancluindo stóricos: Persidente de la Junta, António Cangueiro i Jesé Curralo. Inté tubímos dreito a zayuno an casa de António Cangueiro, un eidefício cun guapo traçado, recuprado cun buono guosto. Oubrigado.

You yá conhecie la maior parte de ls lhocales, mas bejitá los cun tan eilustres anfitriones deu mos l perbileijo de oubirmos stórias de sues bibéncias i de curjidades que, d’outro modo, nunca chegaríamos a saber.

Ua de las maiores surpresas (apuis de l zayuno) fui l aparecimento de l famoso chocalheiro de Bempuosta. Fui la purmeira beç que lo bi. Ye ua figura que merece algua atençon i retratos eiqui ne l blogue, mas esso quedará para outra beç.


Yá arrimado de las dues de la tarde decemos acerca de l Douro pa l almuorço. Las mesas çtribuídas a la selombra de ls choupos formórun-se pequeinhos grupos. Na mie mesa stában pessonas de Genísio, Cicouro, S.Martino d’Angueira i un grupo de spanholes. D’eimenta, cumpleta i eiquilibrada, timprada cun un buono bino, çtaco ua de las eiguaries d’antrada: ourelha de cochino.

Anquanto almuorçámos tocou l telemoble de un de los mordomos, era, nien mais nien menos, Amadeu Ferreira, sendinés mui stimado por todos, mentor destes ancuontros, atrabessar un tiempo defícel. L telifonema trouxo mais alegrie al grupo.


Findo l almuorço, que tubo la persença de un repersentante de l’autarquie Mogadourense (Juan Anriqueç), regressámos l’aldé, mais cuncretamiente a la Junta de Freguesie para bermos ua apersentaçon eiletrónica subre la stória de l’aldé, apersentada i cumentada por un sou porfundo conhecedor, Jesé Carlos. Solo fui pena que stubísse ua calor antensa, porque serie un buono cachico para l grupo cumbersar.

Apersentórun-se ls nomes de las trés personas, mordomos, que ban organizar l ancuontro de l próssimo anho: Adelaide Monteiro, Teresa Almeida i Tiégui Alves.


Antregues alguas lhembranças de l ancuontro, grande parte de ls partecipantes çpediu-se, mas un grupo aporbeitou para bejitar la Capielha de S.Sebastian, porque, antretanto, tenían cunseguido la chabe. Na paç de l sou anterior lhéran-se poemas de l lhibro “Ars Vivendi, Ars Moriendi” de Fracisco Niebro, poesie de mui alto níble cumo l própio armano de l outor Manel Ferreira recunheciu.

I fui cun la lhéngua mirandesa que se findou este ancuontro, cun poesie,  que se eileba de las paisages ressequidas de l berano ne l praino i que fázen destas tierras, tierras de ancantamiento, adonde la simpres cuntemplaçon de l filo de l ourizonte atama l’alma de ls que por eiqui bénen i de ls que por acá pássan.

1 comentário:

leonardo antao disse...

Buonas nuites Antonho:

Gustei muito deste testo i destes retratos de Anibal Augusto Gonçalves, que demunstran que Ancuontros cumo este cuntribuen muito para oumentar l'amisade i l'ounion antre las pessonas que nel partecipan, assi cumo la stima a la lhéngua mirandesa.

Parabienes als mordomos Antonho Cangueiro i José Almendra que faziste un eicelente trabalho de ourganizaçon.

Un abraço,
Leonardo