27/09/13

Las houmenaiges ciertas.



Esta mie cuonta ten todo a ber i por bias dua reportaige que passou na telbison (assi i todo you que siempre digo qu’esta ye la sola cousa zbocada que hai na mie casa, puis nien l gato, perrico, páixaro, cágado nien naide de nós bota malas falas nien alhebanta falsos teçtemunhos) a las bezes esta cousa ten reçumos destes. Damos a saber cousas buonas.
Amostra-mos l paiç tal qual el ye, quanto las gientes son afeiçonadas al sou patrimonho, i quando toca al patrimonho houmano anton ende you derrito-me de lhoubores, admiraçon i tiro la gorra. Si porque apuis de todo, l que sobra son las personas, sóbran cumo eisemplo, que mos guia tantas bezes, cumo seinhas ne l tiempo que nun se muorre, son marcos, paredones que l fuogo i ls nebones nun son capazes de sbarrulhar, por bien taludos que séian i bien mala suorte toque neilhes, la mimória houmana ende stá.

I hai tierras  que ténen un sentido tan forte i tan agarrado a las sues gientes, aqueilhes que fúrun ls atores dun quelóquio d’antigamente, que para abibar i tener mais para alhá de las alhembráncias, inda le bótan státuas, de piedra ou fierro, ne ls terreiros mais afamados.

Cumo quien diç als biajantes, als de fuora, nós nun squecemos, nós queremos que todos sában que las pessonas son l nuosso maior patrimonho, la nuossa maior riqueza.

 I quantas deilhas son un berdadeiro rendir d’houmenaige al pobo, sabido ou lhetrado, bondou que l teçtemunho deixado tenga bencido la guerra ou subrebibido a la fame.

Ua tierra fizo trés státuas i afinconou-las bien eili a modos de todos saberen i beren,  ua simblo de l guarda fiscal dantes, outra dun cuntrabandista dantes i outra dun pescador dantes, l jornalista anteligentemente dezie, eilhas son trés mas cuido que dun home solo, quantos nun éran guardas fiscales pul die, cuntrabandista a la nuite i pescadores nas horas que sobrában!





Sem comentários: