11/01/10

EEileiçones n’Associaçon C. i R. Nial de la Boubielha




Stan cun marcaçon las eileiçõnes pa ls Cuorpos Sociales de l’Associaçon (Mesa d'Assemblé, Direcion i Cunceilho Fiscal) pa l die siete (7) de l més de Febreiro de 2010, pur bias d'ancerrar este mandato.
Las eileçones an qualquiera strutura ourgánica son i siempre fúrun ouportunidades que naide debe perder ou çperdiçar, tamien assi ye i siempre fui n’Associaçon C. i R. Nial de la Boubielha.
Las eileiçones agora marcadas son un momiento amportante que ls associados ténen de dezir l que anténden i quieren pa l próssimo triénio (trés anhos), se quieren demudas ou la cuntinaçon, l feturo stá assi an sues manos.
Se dantes era amportante partecipar na bida de l’Associaçon, agora nun l ye menos, dende to ls associados debien aporbeitar l tiempo até alhá para dar un jeito a sues lhidas para nesse die nun faltar, la bida de la nuossa Associaçon nun s’aguanta se ls associados stubíren de cuostas biradas, cuidáren que eilhes nun cúntan ou de l mesmo modo pensáren que l sou boto nun fai falta.
Andentro de l’Associaçon todos ls associados son eiguales an dreitos i deberes, andependientemente de partecipar muito ou pouco, la porfisson, l’eidade ou l pensamiento que tenga çque cumpra cul stabelecido ne ls statutos.
L’Associaçon C. i R. Nial de la Boubielha percisa de l’anterbençon i partecipaçon de ls sous associados cumo un percisa de pan pa la boca, bibe dies d’abandono, stá antriçada na caleija de l’andefrença de muitos, hai que partecipar para assi cuntinar a dar l sou melhor ne l porjeto global de l assossiatibismo.
A miu ber, ir als cumbíbios, fiestas, jogos, cursos de lhéngua mirandesa i eibentos culturales quando bien calha, nun sustitui botar i dar l sou querer an atos eileitorales i mesmo çponiblidade para fazer parte de ls Cuorpos Sociales
Eilegir ls Cuorpos Sociales ye un ato de deber i cumpanheirismo culs i ls feturos eileitos mas tamien un ato de respeito a la mimória daqueilhes que anfeliçmente yá mos deixórun cumo para aqueilhes qu’inda stan antre nós, que parriba de trés dezenas d’anhos tubírun la feliç eideia de criar esta Associaçon.
Eilegir i dar l sou cunsentimiento ye un modo de mantener l’Associaçon atiba, ye un ato de cunfiança ne l feturo que se quier que seia pur muitos anhos, nun l fazer ye rebelar zanteresse, ye deixar muorrir-se algue que mos dou muita alegrie i proua, mos oufereciu an fiestas i cunfraternizaçones momientos ancumparables.
Eiqui deixo un chamamiento cumo associado zde la purmeira hora, que siempre gustou de l'Associaçon, de ls associados i de ls cumbíbios, para fazer un sfuorço, benir i botar.

4 comentários:

adeusdado disse...

Caro Faustino
Mui ouportuno fui poneres la noticia de la eileiçon de ls cuorpos sociales de la nuossa Associaçon "Nial de la Boubielha".
Será siempre un momento alto para qualquieraassociaçon, i la nuossa para ls associadostamien l deberá ser
Un abraço
Válter Deusdado

leonardo antao disse...

Amigo Faustino,
Yé berdade que la nuossa Associaçon Nial de la Boubielha percisa de mais partecipaçon de ls sous associados para cuntinar a dar l sou melhor ne l porjeto global de l assossiatibismo.
Yé berdade que l associatibismo está an crise, que la sociedade está cada beç mais andebidualista i eigoista.
Yé berdade que somos cada beç menos a acreditar que l maior balor que tenan associaçones cumo esta nuossa ye l de la amisade que se bai mantenendo i criando antre las pessonas que partecipan nos eibentos.
Yé berdade que “eilegir ls Cuorpos Sociales ye un ato de respeito a la mimória daqueilhes que anfeliçmente yá mos deixórun i aqueilhes qu’inda stan antre nós, que parriba de trés dezenas d’anhos tubírun la feliç eideia de criar esta Associaçon.
Nun eilegir ye deixar muorrir-se algue que mos dou muita alegrie i proua, mos oufereciu an fiestas i cunfraternizaçones momientos ancumparables”.
Spero que ls associados çcubran la berdadeira amportáncia de benir botar ne l die 7 de Febereiro, porque la fuoça desta e nuosso Nial de zenízienses está an botarmos, an ancuontrarmos bárias beçes por anho, an mantenermos la fidelidade als questumes i tradiçones de l nuosso houmilde rincon mirandés i, mui amportante, an mantenermos biba la lhéngua mirandesa.
Muito oubrigado Faustino pula tue eicelente colaboraçon na divulgaçon de las Eileiçones.
Un arrochado abraço de,
Leonardo

franciscobelharino disse...

Buons dies Faustino,

Bien ouportuno i lhembrado, screbiste este guapo testo subre las eileiçones de l Nial de la Boubielha. Decierto ls associados ban a dezir presente i a star an peso die siete para cumprir un deber amportante i dar l sou boto para que l' Associaçon puoda cuntinar a zambolber ls sous porjetos.

Un abraço i anté die siete,

Francisco Domingues

Carmo disse...

Faustino ainda não consigo responder-lhe em Mirandês, mas lá chegarei.

Abraço

Carmo