30/01/10

Un manancial a parir

Fechan-se debagarico las jinelas de l rostro,
portaladas a passar l ferrolho al die
que passou correndo.

Porquei será que tan pouco ls uolhos se ancontran!?
Porquei será que ls carreirones de ls dies
se anobielhan contra las nuites
sien que nuite inda seia?!
Porquei será que las ancruzelhadas de las bidas
son atalabancadas tanta beç!

Béngan portaladas abiertas,
béngan suonhos.

Nun quiero caminos para caminar,
nien carreirones, nien filo para seguir.
Nun quiero caminos ancalcados pul tiempo
i nun quiero un filo que me lhiebe
a paraiges sien salida.
Tengo gastos ls dedos,
la fuonte de l alma amubida,
las palabras zlidas.

Traçarei caminos i,
cun la brime acharei outro beneiro
i un manancial nacerá,
para parir bida
a cascalhar an suonhos,
a ceçar an dedos,
a remolinar an palabras.

2 comentários:

Almendra disse...

En Sendin dezimos manantial.
Tu sós un manantial de poesie!

Bs
Almendra

Adelaide Monteiro disse...

Tu tamien yá na tropa te ajeitabas!
Oubrigada, Almendra.

Bs

Delaide