08/01/10

Preguntas de Un Operário Lhetrado

Quien custruiu Tebas, la de las siete puortas?
Nos lhibros ben l nome de ls reis.
Mas fúrun ls reis que transportórun las piedras?
Babilónia, tantas beçes çtruída,
Quien outras tantas la recustruiu? An que casas
De la Lima dourada morában sous oubreiros?
An l die an que quedou pronta la Muralha de la China para onde
Fúrun ls sous pedreiros? La grande Roma
Stá chena de arcos de triunfo. Quien ls arguiu? Subre quien
Triunfórun ls Césares? La tan cantada Bizâncio
Solo tenie palácios
Para ls sous habitantes? Até la lhegendaira Atlântida
Na nuite an que l mar la angoliu
Biu afogados gritar por sous scrabos.

L moço Alexandre cunquistou las Índias.
Solo?
César benciu ls gauleses.
Nin sequer tenie un cozineiro al sou serbício?
Quando la sue armada se afundou Filipe de Spanha
Chorou. I naide mais?
Frederico II ganhou la guerra de ls Siete Anhos.
Quien mais la ganhou?

An cada páigina ua bitória.
Quien cozinaba ls festins?
An cada década un grande home
Quien pagaba las çpesas?

Tantas histórias
Quantas preguntas.

Bertolt Brecht

2 comentários:

Almendra disse...

Hai muita berdade ne l que diç Bertolt Brecht, mas nun antendo mui bien que l demos rezon i mos cumportemos cumo scrabos. Hai que criar ua nuoba cultura, la de la eigualdade, para esso son amportantes ls sfregantes que se ban cunseguindo cumo l que se cunseguiu hoije na Assamblé de la República. Mas falta la eigualdade de tener acesso a la cultura i al trabalho pago i a la dinidade de sermos giente libre i pul menos a tener que quemer i nun starmos atenidos als que cómen a la mesa de ls politicos, mesmo dezindo que son apartidarios. Hai que acabar cun ls falsos squerdistas i cun ls que cundiciónan ls "jobs for the boys". Hai que lutar acontra la corruçon i l trafico de anfluencias.

Fir disse...

Buonas nuites, caro Almendra.
Cuncordo cun todo aqueilho que dezis i tamien cuncordo cun este poema.
You nun dou rezon a todo aqueilho que diç Bertolt Brecht. Mas l grande mérito de ls sous quelóquios i de ls sous poemas ye poner las pessonas a pensar. I esso ye mui amportante.