29/01/10

HOIJE - Las amboras todos ls dies an mirandés

.
Tols dies las amboras an mirandés ne l:
http://www.sendim.net/noticias/hoije/noticias_titulos.asp

Esta ye la ambora de hoije, die 29-01-2010:

XI FESTIBAL DE SABORES MIRANDESES


Yá stá todo purparado para mais ua eidiçon de l Festibal de Sabores Mirandeses a rializar de 12 a 15 de Febreiro, an Miranda de l Douro. Mais ua beç la cultura, la tradiçon i la gastronomie ban a star persentes neste que ye yá un eibento de refréncia na region strasmuntana. Para alhá desso, este festibal ye un “motor amportante pa l zambolbimiento de l municipio”, diç l persidente de la Cámara, Artur Nunes. Acrecentando inda, “qu'esta ye ua ouportunidade pa ls nuossos agricultores bendéren i al mesmo tiempo dáren a coincer l sou porduto”. A par de l fumeiro ls bejitantes ban inda a tener l'ouportunidade de saborear la buona chicha mirandesa, pus cada die de la feira ye dedicado a las raças que stan repersentadas ne l cunceilho. Zde la bitela mirandesa cula famosa posta, l cordeiro mirandés i l cochino cun todos ls sous deribados. Tamien la música tradecional bai a ser ua persençia custante culs gaiteiros, tamborileiros i queda claro, ls pauliteiros.

3 comentários:

franciscobelharino disse...

Buonas tardes Almendra,

Faziste bien an poner esta ambora subre l XI Festibal de Sabores Mirandeses, adonde la Cultura, la Tradiçon i la Gastronomie, ban a star de manos dadas. Ye pena que a la par nun steia la lhéngua que decierto tornaba l eibento inda cun mais antresse.
Un abraço,

Francisco

Tiégui disse...

Hui ! Mas isso calha na San Balentainas... hmm nun sei se nun m'irei you a lheba la moça a quemer un chouriço daqueilhes.

hahahahahahaha...

Buono you nun dixe... bos ye que pensais mal ! Caracho !

Almendra disse...

Buonas nuites Fracisco,

La lhéngua nun bai a star de fuora porque ls mirandeses alhá starán para la falar, cantar i amostrar, porque la Cámara bai a tener alhá ls libros i la anformaçon an mirandés cumo mos dixo l persidente Artur Nunes esta tarde.

Sabes ua cousa Tiégui, se la moça nun quejir ir bai tu na mesma que moças guapas nun ban a faltar alhá.

Un abraço,
Almendra