02/08/09

Teixeira dos Santos ne l Festibal Antercéltico de Sendin

Teixeira dos Santos ne l Festibal Antercéltico de Sendin





"L menistro de las Finanças i de la Eiquenomie stá este fin-de-sumana por tierras de Miranda de l Douro pa l Festibal Antercéltico de Sendin. Teixeira dos Santos yá tenie ido al festibal an 2008 i decidiu repetir la speriéncia este anho por cunsiderar que ye amportante dar besibilidade a un recanto mui rico de l punto de bista cultural i houmano. Houbo mesmo quien fazisse l zafio al menistro pa falar mirandés, cumo se puode scuitar na reportaige de l jornalista Estácio Araújo."



I you nun puodo star alhá. Grrr...




5 comentários:

Ana disse...

Buonos dies Cristóban,

Puis you tamien bi l ministro ne l Antercéltico i quedei tamien mui cuntenta por saber que na nuossa tierra, onte i mui probablemente inda hoije (mesmo cul Antercéltico que normalmenete yá acabou onte), stan tamien a apreciar l que nós tamien gustamos personalidades assi tan amportantes.

Mas tamien te quiero dezir que gustei tamien muito de falar cun tou pai mas inda mais cun tue mai que inda nun cunheci. Stubimos a cumbersar un cacho na junta onte a la nuite antes de ls cuncertos ampeçáren al lhado, nas Eiras para las pessonas que inda nun cunhécen, adonde tamien le(s) dixe que apreciaba las tues cumpeténcias assi cumo l tou ambestimiento an relaçon a esta nuossa tierra de ourige que ye Sendin i l Praino Mirandés an giral, atrabés tamien de la Anternete cumo stamos a fazer agora.
I cumbersemos na sala de la junta adonde tue mai cun mais outras 17 cumpanheiras sendinesas assistírun durante todo este anho, cinco dies por semana, a las aulas que le(s) ban a dar l níbel de l 12° anho, l que ye formidable !
Puls bistos amponírun-le(s) cumo lhéngua strangeira l anglés i parece que para eilhas todas (menos para ua talbeç) fui essa la diciplina mais defícele. Ye por esso que l Mirandés debe tamien de ser aperpuosto i you digo esto porque tengo la eidade de muitas de las alunas desse curso i eimagino la deficuldade que debe de representar tamien l'aprendizaige dua lhéngua strangeira cumo l anglés para pessonas que deixórun de studar hai muitos anhos i que tamien ténen por bezes inda filhos para criar...

Un abraço para ti, Cristóban !
Stou a acabar esta pequeinha mensaige i a oubir al mesmo tiempo ls fuguetes a rebentar ne l cielo de Sendin...
Para acordar ls Sendineses qu'inda stan a dormir...
mas tamien probablemente este nuosso ministro de las finanças... sendinés tamien durante mais uas horas ou tamien quien sabe uns dies...
para antre outras cousas mos oubir tamien falar mirandés.

Biba a todos sien eiceçon, muitas felcidades i buonas fiestas an special nestas nuossas tierras.

Ana

Ana disse...

...este nuosso Ministro de las Finanças... Sendinés tamien durante mais uas horas ou até uns dies...

(Corrijo ! Cheguei a squecer maiúsculas amportantes)

Félç disse...

Palabras lhieba-las l'aire, todos acham isto mui bonito i anteressante, mas quando chega la hora de la berdade, naide se lhembra desta rincon.
No Mensageiro ben um artigo cujo título ye: Trás-os- Montes é a sub-região mais pobre da União Europeia.
Quien tubir ouportunidade de l ler yá bei l que ls nuossos gobernantes se anteressan por mos ajudar a salir de l fundo de l poço.
La eurodeputada Ilda Figueiredo tamien stubo acá, you tube la ouportunidade de cumbersar cun eilha an Fuonte Aldé, no festibal -L BURRO E L GUEITEIRO.
La cumbersa ye la mesma, mui solidários cun ls nuossos anseios, chenos de buona buntade para fazer ua mudança que mos ajude a deixar de ser ls últimos de la fila, mas solo palabras an bano que estamos fartos de oubir bai para mais de 3 décadas.

Scalhabrés disse...

Oubrigado pulas palabras Ana.

Félç, you tamien bi essa ambora i ye dun se arreliar. Nun hai buntade nanhua pa zambolber aquel/este rincon. Nien cun menistros de la nuossa tierra alhá, nien cun "amigos". Nun ye sequiera ua queston de faborecimientos, que yá fumos siempre perjudicados.

Durão Barroso era trasmuntano, Sócrates tamien naciu pa estes lados. Quieren eilhes saber algo desto...

Alguien scuitou ne l porgrama dalgun partido (que yá l tenga apersentado) falar de zambolber l anterior? Até son brutos, porque cumo stamos tan subzambolbidos qualquiera medida fazie anchir l uolho (mas solo Santana quier anchir l uolho, an Lisboua).


Pa quien nun biu mais ua ambora de la RTP queda eiqui tamien la
ligaçon ( pequeníssima? :-S).

Saludos,
Cecílio

leonardo antao disse...

Muito oubrigado Amigo Cristóban (Scalhabrés), por esta curta mas amportante notícia para ls mirandeses.
Gostei de oubir Sue Excelência l nuosso mui eilustre Ministro Dr Teixeira dos Santos (de dues de las mais amportantes Pastas deste Goberno) que dixe ser esse un buono local para carregar bateries i (cun la boç de Amadeu ne l fondo), ya iba falando l nuosso querido mirandés.
Esta pequeinha antrebista, de l nuosso buono jornalista Estácio Araújo, fui ua amportante dibulgaçon de l amportantíssimo Festibal Antercéltico, que cumtribui para melhorar l coincimento de la rica cultura musical i lhinguística de las gientes mirandesas i para dar boç a la houmilde giente mirandesa i sandinesa.
Tengo pena de nun poder estar aí presente, para me dibertir, cuomo me diberti, durante muitos anhos, nas fiestas i arraiales de quaije todas las aldés mirandesas, i, an special, para partecipar no salimiento de ls lhibros de Faustino Antão, de José António Esteves, de Alfredo Cameirão i de (l mieu bielho Amigo) Fonso Roxo.
Este Festibal Antercéltico, esta besita de l Ministro Dr Teixeira dos Santos i este Salimiento de Lhibros de lhéngua mirandesa, son, para mie, ua buona maneira de chubirmos mais un scalon na afirmaçon i dignificaçon de la cultura i de la lhéngua mirandesa.
Parabienes a todos ls ouganizadores de l Festibal Antercéltico i las maiores felicidades para todos ls besitantes i participantes nesse festibal.
Para todos, un abraço, cun muita amisade,
Leonardo Antão.