11/08/09

Ambaiában-se cul marfolho








Nun serie pula cierta l melhor tiempo de jolda pa ls buieiros.
Mas quien me sabe dezir se hai tiempo buono ou malo pa la jolda?
La jolda ye siempre buona, mais aqueilha an qu’iba a ser buieiro pa la Chaneira, nas tardes de berano apuis de la segada, tardes que muitos chamarien d’anfierno.

Puis l chano scaldaba mais que la parede dun forno apuis dua fornada, cumo scalda la tampa dun pote de fierro ne l braseiro de l lhume a cozer l guisado, era por bias de l rechino, l astro rei manteniesse bien porriba de todo tornando las selombras pequeinhas, las pechorras nun aguentában l’auga porque las gorjas quedában ásperas i pedien mais buida, ne ls poços l’auga quedaba fonda, la jolda era l unto de l cuorpos.

Las canhas de la pencas de trigo cortadas culas fouces de ls segadores, stában agora afiladas cumo crabos dua carda, apuntadas al cielo, esse mesmo cielo que habie sido caçuolo de nubres i nuites fries.

Mas la cria inda tenie l marfolho cumo se fura un manjar, naqueilha mistura de pencas i fuolhas secas, semientes i carunhicas de jólio i yerbeiras granadas na Purmabera. Arrebanhában culas sues lhénguas ásperas cumo se lhambíssen la prata d’ambrulho dun caramelo.

Muitas bezes pur ende andube a ser buieiro, i tube la jolda.





(Marfolho - Folhaige seca que queda agarrada a las pencas de l restrolho mais ls fenascos secos granados cumo l jólio i outras yerbas que crecírun na purmabera, que la cria le gusta quemer. Ye muito curjidoso porque la maiorie de las pessonas chega a botar la spresson “stá l termo rapado i la cria nun para de lhaber l chano” mas l segredo ye porque l marfolho ye rico an semientes i fenos doces.
Chaneira - Chamadeiro de l termo de Zenízio




Sem comentários: