08/08/09

La stória de la Ribeira de Tortulhas

L outro die oubi falar de la Ribeira de Tortulhas. Pus eiqui stá la stória deilha.
La Ribeira de Tortulhas nace na Quinta de Fuonte la Taça, ben al para baixo i al chegar a Augas Bibas ajunta-se outro ribeirico que ben de la parte de riba de l lhugar d'Augas Bibas i de ls llhados de Rita Falsa adonde hai ua fuonte cua auga mui fresca i mui buona. Depuis ban puli abaixo yá las dues juntas.
Un cibico mais abaixo ajunta-se-le outro ribeirico que ben de l outro lhado adonde stan hoije ls chouriços, aqueilha fábrica qu´eilhi fazírun na Chana. I alhá ban todas campantes puli abaixo recebindo ls ribeiricos todos que ancontran ne l camino. Ende si yá ye la Ribeira de Tortulhas.

Alhá ban eilhas juntas cumo buonas armanas, pássan anton por Fuonte Lhadon,
Ende, éntran solo ne l termo de Palaçuolo. I yá lhieba ua buona manada d´auga. Lhougo eilhi hai l purmeiro molino inda que agora yá steia sbarrulhado, ye l Molino de la Fraga, sigue al para baixo cada beç más grande porque bai recebindo las augas daqueilhes cabeços todos i tamien un ribeiro que ben de la Zebra.
Al chegar a Calainhos recibe un amigo.
L Ribeiro de ls Lhapadeiros, que trai las augas de l Carrasco i parte de Rita l Cesto, passa por Bal de ls Freiros, pula Cabada. Ende na Cabada junta-se outro ribeirico que ben de l outro lhado de Rita l Cesto de la parte de riba de ls Casales i ua parte de l Maiuolo bai todo Cabada abaixo al chegar a la outra que ben de la Fábrica entran Lhapadeiros abaixo dende l nome de Ribeiro de ls Lhapadeiros. I alhá ban entre ls dous cabeços, l Cabeço de ls Gralhas i l Cabeço de S. Miguel, ye un ribeiro mui ásparo pus queda mui egre i lhieba todo por delantre anté que cai de çofinos an Tortulhas. Tortulhas alhá sigue agora yá mais gorda. Eilhi quando se inche yá bota fumo pulas bentas, a las bezes bien anraibada bai a Peinha Senara adonde tenie outro molino tamien yá sbarrulhado, mas ende agora Tortulhas stá mais guapa pus fázirun ende ua presa i stá mui guapa: un lhençol d´auga marabelhoso para quien se quejir ir alhá a chapuçar.
Mas tortulhas nun pára i sigue sue biaige. Cada beç mais taluda bai recebindo auga de todos ls lhados mais abaixo ye la beç de recebir l ribeiro de ls Furnadales que trai l'auga de grande parte de l termo de Palaçuolo un ribeiro taludo.
L porbeito ye para Tortulhas que queda de barriga chena.
Sigue toda airosa recebindo l'auga toda que l que se quier ajuntar a eilha i cun muitos mais molinos, hoije yá stan todos sbarrulhados. Anton, chega la beç de se le ajuntar a eilha eilhi na Almendreira la outra ribeira de Palaçuolo la que se chama La Ribeirica, i yá ye ua ribeira bien buona pus apanha l´auga toda de l restro de l termo de Palaçuolo i inda auga de l termo d´Augas Bibas. Ban las dues nua sola anté l Puorto Mourisco adonde se chapúçan na Ribeira d'Angueira. Tortulhas tenerá aprossimado a uns binte quilómetros de cumprido, ua cousa assi por alto. Pus l Puorto Mourisco queda yá al fondo de Teixeira.
Pronto ye esto Tortulhas.

José António Esteves

5 comentários:

Tortulhas disse...

Buonas tardes tiu Zantonho!

Las buossas palabras inda son más fresquitas que l'auga de la ribeira de Tortulhas!
Cunserbai bien l manantial donde mana auga tan clara!

Un abraço!
Alfredo

Ana disse...

Buonas nuites, Amigo Zé Antonho,

Ye un berdadeiro "roteiro" este sou testo. Dá-me ganas de un die ir a saber you tamien dessa ribeira i de las outras serbindo-me tamien dessas andicaçones que dá.

Acho que percebi l die de l'apresentaçon de ls lhibros an Sendin que sodes de la mesma família que Palmira casada cun Manel Fiscal. Palmira ye ua prima de l miu home an segundo grau. Ls pais i abós éran de Prado Gaton.

Un abraço

Ana

P.S. Yá li ua buona metade de l sou lhibro de poemas. Acunselho-lo a todos.

Almendra disse...

Teneis que ir a ber la presaan Palaçuolo. Ye guapa la ribeira de las Tortulhas:
http://www.photoblog.com/lalmendra/2009/06/24/ribeira-de-las-tortulhas-palauolo.html

José Esteves disse...

Buonas tardes para todos.

Á Alfredo las augas de tortulhas sie son frescas, assi cumo las slombras que por eilhi hai. Ten toda eilha ua paisaige slumbrante.

Acunseilho-bos a todos ua besita, principalmente a trés sitios.
Un ye eilhi a la fraga al fondo de Fuonte Lhadron, ten ua belheza sien eigual.
Loutro sitio ye an peinha s´nara adonde stá la tal presa ua cousa marabelhosa para passar uas tardes de berano.
Loutro sitio tamien nun se queda atrás ye l Puorto Mourisco adonde tortulhas se chapuça na ribeira de Angueira ye ua paisaige digna dun filme. Ambora ende l falte ua presa
para segurar l´auga, mas de paisaige nun hai porqui.
Teneis que ir alhá bereis cumo tengo rezon.

Ana Palmira ye mie prima carnal sue mai era armana de miu pai. Talbeç l tou home seia primo por parte de l pai deilha miu tiu Tomás sendo assi inda somas de familha.
Sabes Ana tenes que ir cul tou home a tortulhas bais a ber
cumo passas un cacho marabelhoso. Claro que para alguns sitios solo de jiep ye que se bai.

Tiu Almendra yá muito tiempo que nun stube palie, mas you cunheço tan bien aquilho que nun perciso de l ber para saber cumo ye de guapo stá siempre na mie mimória.
Se puodisse ir de ferias arrastraba un charagon palie i andarie ribeira abaixo ribeira arriba.
Procuramos paisaiges por esse mundo a fuora i çquecemos la que tenemos eiqui a mano.

Mui buonas tardes abraços pa ls dous i un beisico para Ana até outra beç.

José António Esteves

Artur Esteves disse...

Do Porto Mourisco estão uns retraticos no meu post "Puntones" de 17-09-2008