26/08/09

Ne l rescaldo






Yá se passórun uns dies, i yá screbi alguas cousas subre la cena pormobida pulas dues associaçones de Zenízio(die 13 d’Agosto).

Mas nun quedaba da bien cumigo se a esta queston nun benisse mais ua beç, i nun sei se será la redadeira, dende nun pormeter nada.
I la rezon ye fuorte, porque l’ourganizaçon, a la repunsablidade de la Direçon de l’Associaçon Sol Nascente, fui eicelente, mais ua beç cumo siempre l fazírun rebelórun-se berdadeiros mestres an recebir i purparar un manjar de tamanha dimenson i culidade.

Dar-le ls parabienes pul modo i jeito que ténen quando arrefúçan las mangas para trabalhar eilhes nun quieren nien percísan, son rapazes que nun ínchan la peitaça d’aire, nun angórdan i nien se pónen an bicos de pies cun agabones, mas berdade seia dita nun ls dar serie ua anjustícia.

Parabiens, trabalhórun bien n’arte de purparar l cochino brabo, trabalhórun bien para que fusse regado cua buona pinga, trabalhórun bien para que to l mundo stubisse aquemodado an mesas i cadeiras.

Stubo todo cinco streilhas, solo tenemos ye que tirar ansinamientos i fazer desta cena un bun ampeço para que mais eibentos béngan an quemun.L'amisade quedou reforçada, l cumbíbio i cunfraternizaçon antre todos ye bien rebelatibo que quando se trabalha para estes balores quedáren mais fuortes, bal la pena cada un de nós nun se poupar i dar l sou melhor.

Ls associados de las dues Associaçones (A C "Sol Nascente" i l’A C i R "Nial de la Boubielha") ténen ende mais ua proba de que a la cabeça de las sues Associaçones stan pessonas que trabálhan pula causa coletiba i arriba de todo stá l associado. Estes eisemplos son berdadeiros ampurriones pa la bida de las Associaçones, a nun ser assi nun habie rezon d’eisistíren.

Ls mius deseios i cuido de todos ye de que béngan mais i nun solo para quemer, hai todo un campo por zbrabar adonde las dues Associaçones puoden ajustar i trabalhar an parcerie pa l angrandecimiento de ls jogos populares, questumes, tradiçones i dibulgaçon de ls artesanos, de las artes, pintura i scrita.


Un abraço a todos

2 comentários:

"Scacição" disse...
Este comentário foi removido pelo autor.
franciscobelharino disse...

Buonas tardes Faustino,

Faziste bien an refuorçar todo l que yá fui dito subre la cena de l associado i de l trabalho an parcerie zambolbido pulas dues Associaçones. Stan ambas de parabienes i an special ls sous derigentes que todo fazírun an prol de l coletibo. L die 13 d' Agosto de 2009, quedará cumo un marco na stória destas dues associaçones, filhas de l memo pobo i armanas ne l sprito de l zambolmiento de ls questumes i de la cultura, andrento i fuora de Zenízio