28/08/09

L Segundo Ancuontro de Bloguers de l Praino
















Die 22 d’ Agosto de 2009, ajuntórun-se na Senhora de la Trindade arrimado a quarenta pessonas de ls bloguers de l Praino; Amnos, Balhe de la Baglina, Ciência an Mirandês, Custantin, Cumo Quien Bai de Camino, Cicuiro ye la Mie Tierra, Cumbençon Outográfica, Galadun Galundaina, Çaramuntaina, Fuontes de l’ Aire, Manolacas, Sendin an Linha i Speciosa Miu Amor. Todas estas pessonas stában armanadas ne l sprito de pertença de la lhéngua mirandesa. Assi, cerca de l meidie ampeçórun a chegar alguas pessonas i yá alhá staba l mordomo cul sou eiquipamiento de son que cun buona música mirandesa muito animou l ancuontro. Apuis de besitar la pequeinha capielha, las çfrentes pessonas aporbeitában para se saludar i dar a coincer. Hai que çtacar l grupo de trés moços i cinco moças lheonesas todos eilhes antressados ne l tema de la lhéngua, que Tiegui trouxo a este ancuontro.
L terreiro de la santa arrodeado de grandes sobreibros adonde datrás ne l die de la fiestade la Trindade las maltas de las aldés çfilában de choupas i calagouças amostrando la sue fuorça, que apuis muitas de las bezes terminában an porrada. Ne ls dies d’ hoije las maltas inda fáien esses çfiles an paç solo para mantener la tradiçon.
Yá cul terreiro bien cumpuosto de pessonas chegou l tiu Isidro de Sendin cun l almuorço que lhougo puso anriba duas mesas purparadas pa l eifeito. Las pessonas fúrun-se arrimando a las mesas i ampeçórun a deliciar-se cul piçpierno cozido, seguido de ua buona carne assada acumpanhada de garbanços, chícharos, selada, pan de l praino que ten un sabor bien çfrente deste de Lisboua i claro que nun faltaba ua buona pinga pa ls apreciadores, auga i sumos. Cumo la calor apertaba nesse die, la subremesa nun podie ser melhor i alhá staba ua buona belancie bien fresquita para aplaquiar un pouco la calor.
Apuis de bien quemidos i buídos era la beç d’ amostrar ls trabalhos que l mordomo habie dito para lhebar. Abelhón reponsable por estes dous purmeiros ancuontros dou l contapie de salida falando a la buolta de l carril mourisco i de la lhéngua. Seguiu-se l porsor Marcolino que cuntou uas cuontas balientes i uns ditos dezideiros, ponendo todo mundo a rir. Apuis tamien l porsor Almendra, Adelaide i Irene contórun uas cuontas picantes. Seguiu-se Felç cun un soneto que bai a star a seguir a este testo i Amadeu Ferreira cun un cacho de l sou remanse que bai a salir an brebe. An seguida Paulo Meirinhos de l Galadun Galundaina brindou ls persentes an purmeira mano cun ua faixa de l nuobo disco que bai a salir alhá para Outubr, tenendo cumo cumbidado Sérgio Godinho a cantar an mirandés. Pula mostra todo mundo quedou cun auga na boca i aspera d’ Outubre pa l mercar.
Apuis dua tarde bien passada cun todo mundo a falar la nuossa lhéngua fui la beç de l mordomo nomear ls reponsables pula ourganizaçon de l 3º ancuontro. Assi, quédan reponsables Franciscobelharino/Francisco Domingues i Tortulhas/Alfredo Cameirão. Estes lhougo aceitórun i marcórun l lhugar de l 3º ancuontro na Senhora de l Rosairo, que queda acerquita de las Minas de San Adrian i de San Pedro de la Silba, cuntinando assi a correr las santas de l praino. L 3º ancuotro cuntinará a ser an Agosto i l die será mais tarde dibulgado. Ls dous mordomos todo fazeran para cuntinar l buono trabalho de Alcides/Abelhón.
Yá la tarde iba alta quando Paulo Meirinhos amostrou ua rebeca custruída por el i tocou uas modas. Tiu Almendra fizo un buono bídeo deste trabalho que yá amostrou neste blogue, bien cumo de l soneto de Felç.
Un bien haia a todos ls persentes neste 2º ancuontro de bloguers de l praino, que dórun mais un passo ne l carril de la lhéngua. Al tiu Isidro de l restorante Ancuontro de Sendin que serbiu un buono almuorço. Als moços i moças lheonesas que anriquecírun este ancuontro i lhéban deiqui inda mais buntade de cuntinar l sou trabalho na recuolha de músicas i na scrita de l lheonés. Un bien haia mui special a Abelhón/Alcides por haber ampeçado estes ancuontros i pula buona ourganizaçon. Pa l anho speramos por todos bós na Senhora de l Rosairo.

Francisco Domingues


Eiqui queda l soneto de Felç


Cabeço de la Trindade

Alto cabeço de berde forrado,
Guarda de l Praino, fiel çantinela,
Bés-lo anteirico dua miradela
I anté la Spanha que tenes al lhado.

Medra an tou lhombo tan rico muntado,
Mora na tue crona an casa singela,
Feita de piedra sien ua jinela,
Dius Pai, Santo Sprito i l Filho houmanado.

Fuste terreiro de guerras i amores
Quantos segredos nun guardas p’ra ti,
Suspiros, gemidos, bózios, delores…

Xaras, sobreiros, selombras i flores
Nácen, crécen i florécen eiqui
I cántan alegres ls reisenhores.




5 comentários:

Félç disse...

Buonos dies Francisco Belharino, parabienes por tan pormenorizada descriçon de cumo corriu l'ancontro, mas, i sendo you de Fuonte Aldé, pormite que te faga ua pequeinha correçon; nun ye "Senhora de la Trindade" mas si SANTÍSSIMA TRINDADE, pese l facto de la giente referir solamente Trindade ou Cabeço de la Trindade.

Abraço arrochado
Félç

ACangueiro disse...

Fracisco,
Cumo siempre, poneis l filme de todo, quaije a modos de Manoel de Olibeira, debagarico i a correr la fita mostrando todo.

Abraço,

Acangueiro

ACangueiro disse...

Para Félç,

Ya habie gostado de l poema i bos oubir dezi-lo mas nun se queda cun to l registro ainda bien que Fracisco lo transcrebeu para eiqui.
Parabienes, acho que fai un registro mui bien feito i santido de l cabeço.
Mi tie nun conhecie l cabeço i diç-me: "Tu sós d'acá i nun me mostras estas cousas tan guapas.

Saludo,

ACangueiro

franciscobelharino disse...

Buonos dies Felç,

Oubrigado pulas tues palabras i pula correçon que fais subre la Santíssima Trindade.

Un abraço,

Francisco

Tiégui disse...

Si pus you pensei que fusse ampurtante que benga gente de la tierra al lhado la nuossa.

Anté inda habie cumbidado mas gente; la rapaciada de Furmientu (nun pudien benir), y uns d'Asturias (que nun respundieren, ye stranho).

You acho qu'esses cuntatos son mui ampurtantes. Ampeçei an 2007 al blog de Cicuiro nesse oujetibo i a final la cousa ampéça a cuncretiza-se. La metade de los qu'eilhi staban ya habien benido a Cicuiro dues bezes la sumana antes l'almuorço.
Assi que pude amustrar Cicuiro i un pouco Samartino tamien.

Achei a Eiban pur suorte. Pus you andaba cul radio puls altos de la Lhuç quando houbo un spanhol a falar. Pongo-m'a falar cun él, i alha me diç que yê bumbeiro que se chama Fernando i que sta nun poste d'ousserbaçon an Campu Sagrau. Un poste asparcido al de la Lhuç, mas an Llion. Cuntinamos a falar de los nuossos aparatos, quando cumbersa feita nisso, pido-lo se fala "Llionés"...

Diç-me que no, i que ya poucos lo falan : "esta ya todo Castellanizao, hasta los viejos no lo hablan" que me diç-él. Mas cuntina falando-me d'un rapaç que se chama Iban, que ye radioamador tamien i que s'antressa pula nuossa lhiengua.
Bon lhougo açpuis acabemos de falar purque ya se mus fazie de nuite.

Soutro die bou you andando de chaça pra Sant'Amaro quando para un carro al miu lhado i un que me diç:
"Hola Thierry ! Soy Ivan, Fernando me hablo de ti y aqui estamos yo, Ricardo y Teresa..."

Fui mesmo assi, ancrible no ? :)