03/08/09

L Burro i l Gaiteiro



Decurriu nos últimos dies de Júlio l festibal itinerante, que ten yá cariç tradicional, – L BURRO I L GUEITEIRO.
Astanho, este eibento cultural ampeçou en Bumioso l die 25 de Júlio, onde se cuncentroran todos ls festibaleiros, se doran las andicaçones que eran scusadas pus toda la giente yá sabe como se debe comportar, - buer anté que se l chege cun dedo, splicar l precurso i anformar sobre ls horários de transporte para pernuitar nos parques de campismo.
La abertura foi feita nesta bila cun spectáculo de tiatro CIRCOLANDO.
Deiqui rumou-se a Bila Chana de la Ribeira, onde se desembolbiran bárias atebidades enquadradas neste tipo de festibales. De Bila Chana a Uba foi um passeio i eiqui, zpuis de bien cenar, hoube música, muita animaçon i cumbíbio cun la giente local.
Soutordie yá cun las baterias cargadas outra beç, hoube nesta bonita i aculhidora tierra, onde se diç que; - ye melhor la auga de Uba que l bino de Mora -, um arraial tradicional cun ls grupos: Toca a Andar, Roncos do Diabo i Velha Gaiteira.
Quarto die, passeio de Uba a Atenor. Ye nesta aldé bien guapa i cuidada que está sedeado l principal protagonista de l festibal – l burro mirandés. Durante la tarde hoube jogos tradicionales i gincana de burros para debertimento de ls partecipantes e curjidosos, um cuncerto an pie dua curriça cun la famosa cantora de jazz SOFIA RIBEIRO.
Por la nuite adrento, dous cuncertos cun nomes que zpensan apresentaçon: l Spanhol GERMAN DIAZ i ls Pertueses DAZKARIEH.
Soutordie, último passeio: Atenor - Fuonte Aldé. Fui neste pequeinho lhugar, que se tornou grande durante dous dies, que se desembolbiu talbeç la parte mais anteressante de l festibal.
La giente de la tierra soube receber ls festibaleiros, poniran ls sou burricos a las carroças i seguiran Lhagonas a riba para ls asperar a l pie de la puonte de l camboio.
Quando se ancuntroran, muito cuntentos quedoran ls que benien, pus para alhá de beran cumo eran bien recebidos tamien aprobeitoran las boleias que aqueilhas carroças l ouferecien.
La antrada no recinto de la fiesta de la Trindade onde decurriran cuncertos durante dous dies i la buolta que doran a l redor de l lhugar fui algo que la giente de de Fuonte Aldé nunca mais squecirá. Fui la cousa mais grandiosa que yamais se biu nesta tierra. Um grupo de gueiteiros adelantre, seguidos de alguas dezenas de mui ourdenados i ritmados tambores (TOCA A ANDAR), toda aqueilha precisson de giente, burros i carroças, ambaixo de um sol ampiadoso, chenos de puolo i cansados, mas tremendamente felizes.
Fui tamien an Fuonte Aldé i antegrado neste festibal que bem medrando tal i qual cumo ua árbore plantada an tierra buona, que decurriu la purmeira FEIRA de ANSTRUMENTOS MUSICALES IBÉRICOS - (FIMI). Bieno giente de toda la Peninsula Eibérica,a mostrar aquilho que fai, la buntade cun que fai i l’amor que pon nas cousas que fai.
A la nuite dous cuncertos: l grupo pertués UXUCALHOS e l spanhol ELISEO PARRA.

Para ancerrar l festibal hoube de todo no derradeiro die: animaçon de rues com, ANDA CAMINO, GRUPO DE TEATRO DE PALAÇUOLO I RONCOS DO DIABO.
Ua cumbersa cum l spanhol Luis Delgado, un nome grande de la música Sefardita, detentor de altos galardones i destintos prémios no panorama musical tradicional, studioso i ambestigador de cultura poético-musical nomeadamente de cariç árabe Al-Andaluç i de scritos tan antigos cumo ls Minnesänger alemones, ls Trobadores Occitanos, las cantigas de l Rei Afonso X, etc.
An seguida, nun curral de ua casa rica de l lhugar outro grande nome de la música de Castielha: PACO DIEZ, acumpanhado por l pertués JORGE LIRA, cantoran i ancantoran com remanses eibéricos, onde Paco Diez tube la birtude de conseguir fazer cum que las pessonas presentes se ambolbissem i interagissen nas modas que apresentou. Um espectáculo notáble.
Nuite adrento mais dous cuncertos. Dous grupos que mesmo sendo die de semana, ajuntoran milhares de pessonas. Ls eilustres filhos de la tierra: GALANDUN GALUNDAINA, que poniran toda la giente a ls poulos i outro grande nome de panorama musical Folk desta “Jangada de Pedra” LA MUSGANHA.
Antre outros ourganismos, l Menistério de la Cultura Pertués, patrocinou este eibento, mas num serie possible rializar-lo sin l’ampenho i la dedicaçon de alguas pessonas que por sinal nun son mirandesas de nacimento mas que aman mais esta tierra que muitos de ls que eiqui nacimos. Ye ua lhiçon que mos dá, Diana Caramelo que fui ancansable na organizaçon de la Feira, montaige de las barracas i anfeite de l recinto. Estan de parabienes las antidades ambulbidas na ourganizaçon de l eibento, son eilhas:
Galandum Galundaina;
AEPGA;
Sons da Terra;
Lérias.
A la moda de recado: Tamien las autoridades locals deberien oulhar cun outros uolhos para estas cousas i dar-le todo l’apoio que merecen.
Las troubisones i la comunicaçon an giral stubírun a dromir estes dies.




9 comentários:

franciscobelharino disse...

Buonas nuites Felç,

Parabienes por mos dares a coincer esta fiesta de l burro i de l gaiteiro, que puls bistos fui ua fiesta de arromba an bárias tierras. Mais ua beç las outoridades locales quedórun de fuora, mas fui buono haber l patrocino de l Menistério de la Cultura.

Un abraço,

Francisco Domingues

Unknown disse...

Quando beio screbir ciertas cousas até medá ua cousa.
Ua Cámara que pon dues eiquipas de homes a porparar todo, durante dies, que apoiou l porjeto que ajuntou l lhado de Pertual i de Castilha i las Associaçones. Las Juntas de Freguesie que dórun l que podíen i nun podíen. Las Associaçones que ponírun muita giente a trabalhar. La giente de l pobo que siempre acarinou todo. La delegada de la cultura de Bila Real i até la deputada Ilda Figueiredo que stubírun ne l salimiento de ls libros an mirandés i an todas las açones. I nun falo mais para nun dezir algo que me faga arrependir, quedórun de fuora i l menistro que bino a passar uns dies, cumo fai mais bezes, porque ten ami(g)os an Sendin, ye que ye l mais amportante. Tamien houbo muita giente amportante mesmo de l BE que quejírun andar cul pobo.
L Menistro nun promobiu nada, inda que you l conheça bien i l tenga cumo de ls melhores i mais hounestos, mas cumo se biu, l Menistro que tanto bos anfadou - l Menistro de la Cultura i que fui you l unico que l defendiu, fizo muito i stubo representado an todas las manifestaçones.
Franciscobelharino, queda feio meter nestas manifestaçones l anteresse partidário.
Nada tenerie sido possible sien la càmara.

Almendra

Isilda disse...

Buonos dies Felç,

Tamien bos bengo a dar ls parabienes por mos dar a coincer l que fui ua guapa fiesta.
Parabienes pula çcriçon tan an pormenor de ls acuntecimientos i puls retratos.
Tamien digo amén cun Franciscobelharino, las nuossos outoridades lhocales son las ultimas a dar amportancia al zambolbimento, seia el qual fur , de l nuosso praino. Ye por esso que stamos cada beç mais squecidos.
Ye lhamentable qu'esso acunteça!

Saludos a todos,

Isilda

Isilda disse...

Buonos dies amigo Almendra!

Nun bos zangueis!!

Nun sei l qu'acunteciu, que nun stube persente, mas l cierto ye que stamos mui squecidos i las unicas pessonas que deberian fazer cun que l praino fusse un lhocal d'ancanto, porque tenemos todas las cundiçoes para esso, son sin dubida las nuossas outoridades lhocales.Se fázen algo deberian fazer mais.
Son muitas bezes las pessonas que stan lhoinge dende, que mais se antressan para qu'i praino mirandés seia coincido de norte la sul.

Un abraço amigo,

Isilda

Unknown disse...

Isilda,
Quando stabas a screbir l purmeiro comentairo starie you a poner l miu, tenes toda la rezon de que muito hai que fazer mais. Todo mundo bai para fazer l melhor i ye tiempo de antender que la telbison nun faç casas nin festibales, mas faç giente cumo Hitler ou Salazar.
Tamien faç muita cousa buona, mas ten que ser libre i democrática.

Almendra

franciscobelharino disse...

Buonas tardes amigo Almendra,

Se ye ua cousa que you nun fago ye meter l antresse partidário nestas cousas, anté porque nun tengo partido. You apenas dei amportança al que Felç mos dezie na sue reportaige. Mas se la Camâra i las Juntas de Freguesie stubírun ampenhadas na ouganizaçon para que todo stubisse bien, als mius parabienes.
Bá Almendra que todo cuntine a correr bien i un grande abraço.

Francisco Domingues

Unknown disse...

Amigo Francisco, si porque eiqui todos tenemos que ser amigos i mais, ua familhia de que you tengo ourgulho an fazer parte.
Onte i hoije la Junta de Freguesie de Sendin i l pessoal de la càmara inda nun parórun a limpiar, a barrer, a zmuntar todo. I ua ye de l PS i outra de l PSD. You tamien nun tengo partido, apoio l que stá bien i quando nun me gusta nun me calho.

Un abraço

Almendra

Félç disse...

Buonas tardes,
You nun tube antançon de criar questones quando dixe que las outoridades locales deberian oulhar cun outros olhos, yé claro que colaboran, la Câmara montou l palco, forneciu las barracas, que anté eran de strena, la junta de freguesia an Fuonte Aldé tamien dou las anstalaçones para serbir las refeiçones i que sei you mais!!!, mas tiu Almendra, se stubistes acá debeis tener oubido las palabras de ua pessona que ten responsabelidade na ourganizaçon i que falou no palco durante um cuncerto, tamien oubistes que pediu para que essas outoridades olhen de ua forma mais séria para estes eibentos.
Daí tirei la conclusão.

Unknown disse...

Buonas tardes Felç,
Tu bien sabes que you gusto de ti porque sós de ls eirredutibles por l mirandés i la nuossa tierra, nunca bou a pensar que faziste mal, mas a las bezes tenemos que tener cuidado para que outros nun aporbeiten l que nun se quier dezir. L que falou ne l palco fizo l sou papel que ye pedir mais, mas bamos a trabalhar todos para que esso seia possible i solo nun será se deixarmos mandar ls lacaios de ls partidos.

Abraço

Almendra