05/08/09

Frezno - Freixo




Chubindo uolmos ampalpando buracos de tocos bielhos, spreitar por antre palhas nialeiras de pardal rebulhon antressacadas cun menudas de l nial de la ciguonha ou angaiolar-me nua stacada de la cereijeira maior de l lhugar siempre fui meia abintura i ganas de mirar l mundo de riba. Deixar las mulas nos restroilhos i chubir la sierra de la Lhuç adreitos al Castielho para aspuis mirar la prainada era assi cume ua pormessa a cada anho que la mano de ls panes quedaba a modos. Inda hoije essa manha me pon “anquemodado” se camino por caleijas ou fundales, sítios medruncos i assobedados por silbas i spineiros. Sinto falta de l berde de l Praino: berde de touçones que naide atrabessa, berde de scobas an adiladas bielhas, l berde antressacado de amarielho claro de ls castanheiros i más que todo l berdegar siempre fresco de la selombra dun frezno – freixo, cume dezimos na raia – que se sparige por todas las ourrietas que la bista alcança. Parece ua manta berde, nubrina de Júnio amorrada nos fundales, ganado amuntonado an lhinhas d’auga al redor de cabeços chenos de bida i de sol. Inda hoije, cume muitas bezes, miro esse berde pula pantalha, de riba, nesses retratos tirados de bien alto i a que chaman “google earth”. Ye un bolar sien peligro que afila ls sentidos i las ganas de mirar aqueilha cemba feita de grandes belhones berdes ansartados antre cabeços i sembrados antre rendas de piedra de la "bicha sien fin" cun alas i fincones. Gustaba de fazer un poema a essa arbol tan nuossa mas falta-me an jeito l que me sobra an ganas. Un poema a la más fresca selombra, sustento de la cria na sequitude de l brano, lheinha para calcer las almas na fuorça de l carambelo acarreada por eixes feitos de sous armanos ligando rodados salidos de sanas toradas de l maior deilhes. Casa de niales de gralho, de mielra, de rola i de palombo trocal, de rato papialgo, toco de boubielha i cortiço de l melhor miel: tanta bida al sou redor! Tamien el marca l tiempo, gromos antes, fuolhas aspuis, semientes amarielhas purmeira seinha de sementeira i de bida na prainada.




4 comentários:

AF disse...

Testo guapo cumo un frezno. I nun zasperes por bias de l poema: que outra cousa ye l que acabas de screbir?

Un abraço arrochado
Amadeu

Félç disse...

Poema mais guapo que este!!! isto tamien ye poema. Freixo na raia! no sul de l cunceilho tamien se diç freixo i ye tiempo de ls zgalhar.
Bemos-mos na Trindade
Cumprimentos
Félç

AF disse...

Buonos dies,

Subre freznos, ou la falta deilhes, eiqui queda la quadra 237de Fonso Roixo:

Sien freznos, quei son ls cerrados
a mais que un balhe sien alma?
Até ls buis quédan barados
sien selombra pa la calma...

Un abraço,
Amadeu

franciscobelharino disse...

Buonas tardesw Abelhon,

Parabienes por tan guapo testo. An Zenízio tamien dezimos freixo.

Un abraço,

Francisco Domingues