Sol dantes, reloijo agora

*

Reloijo de sol

"L die binte de Janeiro yá l die ten ua hora por anteiro". Assi sendo, i medindo l tiempo de l nacer até al çponer de l sol, esse die yá ye mais grande ua hora. You percurei-me, l que fiç cun mais ua hora de sol nesse die? Nada. Quaije se podie dezir que nien me dei de cunta.

Morando you nua tierra que yá ten l nome Bila, porque arrecuolhe miles de pessonas i pula grandura, nun s’ancuontra çfrença dua cidade. Puodo dezir que to l mundo porqui, la hora que l die binte de Janeiro ten a mais, fui mandada a las ourtigas. La bida porqui ye rejida por muitas outras cousas, menos pul sol. Hai sítios que nien se sabe quando l criador nace, la grandura de las casas ye tanta que sconde essa marabilha que mos alhumbra, esse rei que yá nun ten fuorça de demudar muita cousa. Las pessonas, nesse die, alhebantórun-se de sues camas, lhebórun ls ninos a la scuola, almorçórun, fúrun-se a trabalhar, fazírun l camino de buolta a casa, agarrórun ls ninos, cenórun i fúrun-se a drumir a la mesma hora que ls outros dies. Ye causo para dezir, nun ye perciso l die de sol crecer mais ua hora que nun sirbe de nada. I, cumoquiera, assi le bai a acuntecer als outros dies que ban a tener mais sol, porque agora ls dies stan medrando.
L sol fui trocado pul reloijo. I ye eiqui que antra la mie pequeinha cuonta. L purmeiro reloijo que tube, mercado por miu pai, nun sustituie l sol. Anhos apuis, cheguei a pensar que nun baliu de nada gastar l denheiro. Solo serbiu para you arrefucir la manga i amostrar que tenie un reloijo. Porque ls outros rapazes yá l tenien i fui por essa i mais nanhua rezon. Se ls outros tenien you tamien tenie que tener para nun me quedar atrás. Proua... Que se bai a fazer? Porque la mie bida de nada demudou, s’iba a ser buieiro ou pastor solo arrecolhie la cria ou l ganado apuis de l sol se çponer. Quando querie saber se yá era meidie até gustaba de l saber pula mie selombra i culs passicos.
Cumo las saludades me bótan ua mordesquina desse tiempo, sin la ditadura de l reloijo! Perdi todo esso l die an que, pula hora de l reloijo, la carreira parou a la hora cierta a la Capielha (al meio de la pobaçon de Zenízio) i you neilha antrei.