2008

Para l miu purmeiro scrito deste anho, bou a agarrar las puntas de ls redadeiros scritos de Fir (nun ye que el deixe puntas suoltas!) a ber se sou capaç de las ajuntar.

L causo ye que you tamien me gusta muito ls zeinhos animados. Para quien passou la garotice a ber ls porgramas de Vasco Granja, yá nun ye pequeinha áfrica inda gustar de zeinhos animados. Assi i todo, quien me tira l Speedy Gonzalez fai-me ua çfeita! I apuis tengo an casa dous garotos pequeinhos, de maneira que agora ando a matar soudades de la Maya, de l Vicky, de la Heidi i dessa quemandita toda!

Mas l filme de que you querie falar ye outro: chama-se "A quinta dos animais", i ye anspirado ne l libro de George Orwell "Animal Farm". You solo bi, yá quantá, ua berson drobada an pertués de l Brasil, nun sei se haberá outras por ende. L libro - que tubo la traduçon an pertués "O Triunfo dos Porcos"- si yá l li más de ua beç, i requemendo-lo, lei-se de lapada, bonda ua nuite cun pouco suonho.

Dízen ls antendidos que ye la más buona fábula política de l seclo XX. Parece ua cunta para ninos, mas ls más bielhos tamien puoden passar ls uolhos por alhá. La frase más coincida ye: ls animales nácen todos eiguales, uns más eiguales que ls outros! - nien será perciso dezir más nada.

I isto lhieba-me al outro scrito de Fir, subre la beda de fumar ambaixo de teilha (datrás yera al cuntrairo, trazie-se la teilha ne l bolso, para chiçcar l chiçqueiro ambaixo de teilha).

Puode parecer que nun ten nada a ber, mas tamien puode ser que si.

Ye que George Orwell (que screbiu O Triunfo dos Porcos) tamien screbiu outro libro, talbeç l que le dou más fama, que se chama 1984. Mil, nuobe cientos i uitenta i quatro, querendo poner las letras todas.

Nun fago tençon de falar muito de l libro (ou anton nun salimos deiqui hoije), bundará dezir que fui alhá que apareciu pula purmeira beç la spresson Big Brother - Big Brother is whatching you -, an que l Big Brother (l goberno) stá siempre de uolho an las pessonas i dá-se cunta de todo, quemanda todo, mesmo l pensamiento de ls cidadanos.

Ora, an 1984 (segundo las prebisones de l libro), you nun dei por nada, afuora l habéren-me fazido andar cun capacete an la mota, l que yá nun fui pouco, que nun me deixaba poner brilhantina ne l pelo...para un rapaç pimpon cumo you nun yera pequeinho perjuizo!

Mas agora si yá ampeço a star pula poda de Fir, un cachico farto que l goberno se meta an la mie bida i que querga que you muorra de bielho...cheno de salude!

I se fura solo isso!

Quereis outro causo? Diç que ban a poner máquinas de filmar an las rues (la notícia que you oubi falaba ne l Porto) para perbenir ls crimes a la nuite. Mui bien, naide poderá alhebantar la boç acontra isso, quien nun debe nun teme.

Mas apuis lei-se más ua notícia que diç que an la Grã- Bretanha haberá antre 4 i 7 melhones de máquinas de filmar an la rue, i que cada pessona será, an média, filmada uas 60 bezes por die. Dá que pensar!

An 1948, quando fui scrito, 1984 yera ficçon. Hoije, an 2007 - á ye berdade! - 2008, yá nun stou tan cierto disso.