30/01/08

Las remodelaçones



Jesé Socras mudou dous menistros. Cunfesso que nun speraba. Quando hai remodelaçones nun goberno, eisiste siempre ua dúbeda: será que esso se bai a traduzir an mudanças de políticas ó solo múdan las moscas?
La nuoba menistra de la salude yá dixo que apoia "las reformas an curso". Pula sue maneira de falar, pareciu-me que ten talento para fazer de mona, ó seia, fazer l que Socras mandar. Quanto a la cultura, stou cuntento cula salida de Isabel Pires de Lima, até porque anunciei i assinei ua petiçon que iba nesse sentido ("Un projecto cunsistente pa la Cultura an Pertual"). Nun conheço l nuobo menistro i bou a sperar para ber l que el fazerá, antes de comentar. Ye perciso cuntinar a pressionar, para que se beia un porjecto cunsistente pa la cultura pertuesa i se defenda l nuosso património, ancluindo l lhenguístico.
Correia de Campos i Isabel Pires de Lima nun tenien perfil pa l lhugar. Mas, cumo todos sabemos, nun tener capacidades para se ser menistro nunca ampediu muitos de acupáren essas cadeiras. Esta remodelaçon ye curta. Yera perciso que outros menistros salíssen: Eiducaçon, Ansino Superior, Obras Públicas, Eiconomie, Agricultura, etc. Lhibrarmos-mos deilhes serie un passo grande i amportante pa l porgresso de l nuosso paiç.


1 comentário:

Abelhon disse...

À Fir, bás a çculpar mas según la tue oupenión nun són las personas que están a más, ou que nun ténen perfil. Nó! Al que tu quieres dezir ye que las gobernaçones desses menistros nun sierben e són tuortias cume um palo de spineiro.
"Eiducaçon, Ansino Superior, Obras Públicas, Eiconomie, Agricultura, etc." al que sobra? Ansino Superior nun conheço, sou agricultor; Eiducaçón, cada béç los studantes saben menos e los pursores trabalham más ... adelantre senó teniemos eiqui ua nuite de relatórios e portefolios que se fazem para acupar meia dúzia de antelectuales nos gabinetes de las ounibersidades; Obras Públicas, dues cousas, a quien antressa la O(bra) T(ransferida) para A(lcochete) e essa cousa dal TGV? Eiconomie, de quien? Agricultura, basta mirar pal praino para ber todo de adil e na raia cheno de scobas; (Frezno, ribeira de Samartino e esses ribeirecos que corren pu las ourriêtas, ninguã auga se aporbeita e que tanta falta fai no brano. Que l digan las gentes dal Palancar, Infainç, la Pruoba, Zenízio, Caçareilhos ou Bilar Seco. Mas nada. Ramos pa l santo e foguetes para atelundrar al pobo.
Stou cume dezie um amigo eitaliano quando splicaba nun pertués meio atrabessado: "Il Colosseo era prà que il populo sera calmo, l'Emperador le daba pan et chirco ...".
Todos tenemos circo ... pán ...
Meias nuites ...
bou-me a la cama.
até manhana an Miranda!!