«La campanina de la capielha de San Ciroç, tenemos siempre oubido dezir, quando s’amenta neilha, que fui ancuntrada adonde le cháman La Campanina, eiqui ne nuosso lhugar.
Tamien siempre ténen dito que era de ls mouros, i que yá an cierta oucasion ls spanholes la quejírun anchir de duros, pa l lhugar, i lhebá-la pa Spanha. Ls de Zenízio nun quejírun dá-la i aponírun, porque nun hai denheiro que la pague, porque ten la bertude de retener las trouboadas que nun éntren ne l nuosso termo, miesmo quando eilhas bénen cargadas de piedra. Nun hai naide que s’acorde de eiqui s’apedriáren ls panes i beníren chiçpas, senó ua beç que matou ua rapaza que staba filando i dízen que naquel die se nun habie benezido i daba muita parola als moços i als fidalguicos quando iba a Miranda.
Ye para nós un punto de fé, que, cumo ampéçan a tocar la campanina antes d’antrar ne termo la nubre, yá nun hai peligro que benga; i se benir, nun fai mal niun, porque la campanina derrite l graniço ne l aire, anque seia bien de rijo, desfai todo an auga.
Hai ciertos figurones que fan zumbarie por dezirmos isto; mas que se rían l que quérgan, i que dígan l que le dé la gana, porque nós yá tenemos bisto, i stá bien spurmentado i soubido.»
Deixo eiqui este testo cumo houmenaige als zenizienses que scríben neste blogue i als que l léien, lhembrando ls testos que eiqui deixo Faustino Anton, an Júnio passado lhembrando un testo de Antero de Figueiredo subre la capielha de San Ciríaco i la sue lhienda. Ora l testo de Antero de Figueiredo ye yá de l ampeço de seclo XX i l que eiqui deixo ye de la fin de l seclo XIX. Pula cierta que el al fazer la biaige haberá lido l lhibro de Albino Moraes Ferreira, que era mirandés i esso le haberá deixado la curjidade de parar an Zenízio i preguntar pula lhienda. Bendo ls dous testos bei-se que ténen eideias aparecidas.
Solo mais ua cousa. Diç-mos Faustino Anton que la capielha staba sbarrulhada quando el era garotico. Mas la berdade ye que eilha inda starie de pies quando aqueilhes testos fúrun screbidos. Antoce, pregunto: cumo ye que deixórun sabarrulhar la capielha de un santo tan milagreiro i adbogado contra las truniadas?
4 comentários:
Bien puosta la buossa percura.
Será que quedórun anraibados cun San Ciríaco porque causa de la muorte de la rapaza? A las bezes l pobo até culs santos queda danhado, mesmo que tenga çculpas.
Cumo sei que hai muita giente de Zenízio que ben eiqui ler, quien sabe se un die inda se fai lhuç!.
Cuido que inda hai pessonas que fúrun teçtemunhas de la capielha star de pie, que qpuis la bírun cul tiempo ir-se zbarrulhando i agora que stá amanhada.
Hai que percurar, studar i l tiempo l dirá.
Yé para mi siempre motibo de satisfaçon ler i oubir falar de la stória de l grande patrimonho religioso de la nuossa aldé de Zenízio, constituído por dues capielhas i ua grande eigreija. son mui anriquecedores ls testos screbidos neste blogue por Amadeu Ferreira i por Faustino. Yé mui pertiniente la queston deixada "cuomo ye que deixórun sabarrulhar la capielha de un santo tan milagreiro i adbogado contra las truniadas?"
Nun se puode dar crédito a tuodo l que se oube, mas quando you era pequeinho lhembro-me de oubir la pergunta "porque esbarrulhoran (ou porque pegoran fogo a) la capielha de San Crico? E de oubir respuostas parecidas cun la pergunta de Faustino " porque se anraiboran cul Santo por causa de la muorte de la rapaza" Mas quando isso acuonteciu? Dezien, tener sido por buolta de l anho de 1011, ou seia, na mesma altura que bárias eigreijas i capielhas de Pertual teneran sido esbarrulhadas, alguas an Miranda, i isso talbeç se ancontre nos lhibros de l Eipiscopado de Bragança i/ou de la Cámara. Repito, "nun se debe dar crédito a tuodo l que se diç ou l que se oube" por isso yé mui prudente l que screbiu eiqui Faustino, "cuido que inda hai pessonas que fúrun teçtemunhas de la capielha star de pie, ... Hai que percurar, studar" i perguntar a essas pessonas mais bielhas, hai que ambestigar nos arquibos stóricos de l Eipiscopada i de la Câmara i tantar creber la berdadeira stória de la capielha. Son para mi, dignos de honra i loubor tuodos aqueilhes que ban percurando, studando i construindo la stória de la nuossa querida aldé de Zenízio.
Ye mui antressante essa buossa eideia, de ua de las possiblidades ye que las pessonas se hában anrabiado cul santo por bias de la muorte dua rapaza.
Isso faç algun sentido dado l modo cumo las pessonas lhidában culs santos. Beia-se l causo de l santo de Palaçuolo (l de l «caramonico») i hai outros causos. Las pessonas éran debotas de l santo, mas este tenie que cumprir la sue parte.
Bamos a ber se cul tiempo se sclarece essa question i outras de outras aldés adonde hai capielhas abandonadas, inda que an alturas defrentes.
Correcçon:
Na linha 18 de l miu comentário, onde se lei 1011, debe ler-se 1911.
Enviar um comentário